Mizoramah Zalenna Ni hmang

India Independence Day vawi 77-na chu vawiin khan ramchhung hmundang rualin Mizoramah lawm a ni a. A lawmna pui ber Aizawl Lammualah chief minister Zoramthanga chuan hnam puanzar pawtpharhin parade contingent 27-te chibai a chhanglet. Mizoram mipui leh khawvel hmun danga India khua leh tuite duhsakna hlanin, kum 200 chuang awpbeha awm tawh India ramin zalenna a hmuh theihna’na beitu hruaitu hmasate leh tha thawhtute zahna chibai a buk tih a sawi.
Zalenna boruak nuam tak hnuaiah India ram hmun dangte ang bawkin Mizoramin hmasawnna duhawm tak tak a hmu nasa tih sawiin, kumin phei chu India ramin G-20 presidency a chelh kum a ni a, he mawhphurhna hi tha taka a hlen theihna’n ram chhung hmun hrang hrangah inkhawmpui buatsaihin, Mizoram pawhin G-20 Business – 20 Conference chu kumin March 2 khan a thleng a, ram 17 atangin palai an rawn kal tih a sawi.
Kum li leh a chanve kalta chhung khan harsatna chi hrang hrangin min chim rualin, state mipui tanpuina leh thawhhona tha avangin harsatna tam takah hnehtu kan ni thei tih Zoramthanga hian a sawi a ni.
Kumin May thlatir atanga Manipura buaina chhuak chuan vawiin thlengin Mizoram pawh a la chim tih a sawi a. Buaina a chhuah rualin Mizoram sawrkar chuan a khua leh tui, a bikin Imphal-a awmte chhanchhuahna hna a thawk nghal a, Mizoram mi thiarchhuahna atan sawrkarin cheng nuai 36 chuang a seng tih a sawi.
July 18 thlenga chhinchhiah chinah Manipur atangin Mizorama sahimna zawng mi 12509 an rawn lut tawh a; Aizawl leh district khawpui thenkhatah relief camp din niin, heta awmte tan buhfai quintal 2388.50 pek a ni tawh tih a sawi. Mizoram sawrkarin raltlante chhawmdawlna’n hian cheng vaibelchhe 5 a ruahman a, a bak mamawh dangte phuhrukna’n sawrkar laipuiah vaibelchhe 10 dil mek a ni tih a sawi bawk. “Kan unaute tanpui tur hian kohhran, tlawmngai pawl, thianho leh mimal tam takin an thawhhlawk em em a ni,” a ti.
Zoram mipui, a bikin tlawmngai pawl hrang hrang leh kohhran mite chungah, kum 4 leh a chanve chhung an thlawpna tha tak a dawn avangte, an rintawkna lawmawm tak a hmuh avang leh kawng hrang hranga sawrkar hmalakna an phungbawm avangin a lawm tih chief minister hian a sawi a. Sawrkar hnathawkte thawhrimna leh inpekna a chuan thu sawiin, chanchinbumite leh Mizorama sawrkar laipui pisa hrang hranga thawktute chungah lawmthu a sawi a ni.
“Boruak tha lo leh ralmuang lo hnuaiah ramin hma a sawn thei lo tih hrerengin, remna leh muanna vawnghim a, harsatna awm apiang inlungruala hmachhawn a, hneh zel tura rilru insiam thar chungin, Mizoram tan theihtawp chhuah zel ang u,” tiin mipui a sawm a ni.