Haaland leh Saka an langsar

Pofessional Footballer Association (PFA) chuan PFA Player of the Year award dawng thei tur an chhawpchhuak a. Manchester City forward Erling Braut Haaland leh Arsenal winger Bukayo Saka te chu chawimawina pahnih dawng thei dinhmunah an ding a, an hming a langsar hle.
PFA Player of the Year award dawng thei turin mi paruk chhawpchhuah an ni a. EPL-ah season khat chhunga goal thun hnem ber record siam a, EPL, champions league leh FA Cup-a Manchester City champion puitu Erling Haaland chu chawimawina sang dawng thei tura hming langsar a ni a. Arsenal player pawimawh Bukayo Saka pawh hming langsar a ni bawk. PFA Player of the year chawimawina dawng thei tur zingah hian Haaland leh Saka bakah Kevin De Bruyne (Manchester City), John Stones (Manchester City), Martin Odegaard (Arsenal) leh Harry Kane (Tottenham) te chhawpchhuah an ni bawk.
Chawimawina sang dawng thei tura rinkai Eling Haaland hian season liam ta khan City tan inelna hrang hrangah vawi 52 a khel a, goal 53 zet a thun. EPL-ah khelh 35 atangin goal 36 zet a thun a, EPL-ah season khat chhunga goal thun hnem ber record thar a siam a. EPL-a a season khatnaah a che ropui nghal hle. City hi EPL, Champions League leh FA Cup-ahte a champion pui a, EPL leh UCL-ah topscorer a ni tel bawk. EPL 2022-23 season-ah EPL-a player tha ber leh rawlthar tha berah thlan niin, he chawimawina dawng kawp thei awmchhun a ni bawk. PFA chawimawina sang dawng kawp leh thei dinhmunah a ding leh mek a, a pahniha a dawng em lo a nih pawhin pakhat zawk zawk hi chu dawng ngei tura ngaih a ni.
Haaland elpui lian ber ni tura ngaih Bakuyo Saka hian season liam ta khan Arsenal tan EPL-ah goal 14 a thun a, assist vawi 11 a nei tling bawk. Arsenal leh England player pawimawh Saka hian PFA Chawimawina sang ber a dawng lo a nih pawhin rawlthar chawimawina tal chu a dawn a rinawm.
Manchester City in trophy lian pathum an lak theih nana thawhhlawk tak Kevin De Bruyne chu PFA chawimawina sang dawng tura rinkai zingah a tel bawk. Playermaker tha ber ang hiala ngaih De Bruyne hian season liam tan khan City tan vawi 49 a khel a, goal 10 a thun a, assist vawi 31 zet a nei tling bawk. De Bruyne bakah hian City tana khel tha thei tak John Stones chu chaiwmawina sang dawng thei tura chhawpchhuah zingah a tel a. An team an chet tha loh lai pawha mimal taka chetha a, goal thun thei pawl ni reng thin Harry Kane chu chawimawina sang dawng thei tura chhawpchhuah zingah a tel bawk.
Tarlan tawh angin rawlthar tha chawimawina dawng tura chhawpchhuah paruk zingah Haaland leh Saka te an langsar a. Anni pahnih bakah hian Arsenal tana khel tha tak Gabriel Martinelli chu hming langsar a ni. Brazil forward hian season liam ta khan EPL-ah goal 15 a thun a, assist vawi nga a nei bawk. Anni pathum bakah hian Brighton player pahnih an tel a, Chelsea in British player manto ber ni thei tura an lak luh Moises Caicedo leh Evan Ferguson te an tel a. Aston Villa star Jacob Ramsey chu rawlthar hming langsar zingah a tel bawk.