Tribal thlavang hauhna aiin BJP paihna remchang an zawng – K Vanlalvena

Manipur buainaa Parliament-a inhnialnaah eptu lamten tribal thlavang an hauh hrim hrim vang niloin BJP paihna remchang an zawn vang a ni ber a. Mizoram MP te erawh chuan kan unaute tawrh chen an huam vanga tang an ni tih Rajya Sabha MP K Vanlalvena chuan a sawi.
Zirtawpnia Mizo Hnam Run inkhawmah K Vanlalvena hian thu a sawi a. Manipur buainaah Parliament member-te chuan nakuma Lok Sabha inthlan turah BJP sawrkar paihna’n remchang an la tih a sawi. “Kan unaute an tan vang a ni lo. Rahul Gandhi pawhin a tan chuang lo. BJP sawrkar tihmualpho hrim hrim an tum. Keini erawh chuan kan unaute tawrh chen tawrh kan huam vang a ni. An ni chuan tribal thlavang an hauh loa, BJP sawrkar tihmualpho chiah an tum,” a ti.
Manipur thil thlengah MNF ropui zia a lang dawn chauh nia sawiin, “Tuna kan unaute luah ram saw MNF-in Mizorama a rinluh thin a ni. Amaherawhchu, anmahni lamin kan lama beh an chak lo. Tunah erawh kan hnena beh an chak tak tak tawh. Kan thenawm unaute hian kan chief minister hi hotuah an rawn pawm tlat a ni,” a ti.
Pathianin Zofate daidanna ramri min thiahsak mek a, tunah chuan thinlung ramri a chim mek tih Mizoram MP hian a sawi a. Rorelna pakhat hnuaia awm thu aupui thin mah ila, a chhunga chengte thinlung a inrem loh chuan a thleng thei loa, tunah chuan kan thinlung a inzawm mek tih a sawi a ni.
Lok Sabha-a thusawina chan a harsa a, Rajya Sabha-ah chuan hun chan a awlsam tih a sawi. “Rajya Sabha-ah chuan member kan tlem a, thusawi tum ngar ngar chuan hun a chan mai theih. Lok Sabha chu mipui thlan, leadership nei tha an ni a, hun chan a harsa. Rajya Sabha-ah chuan chairman phalna in vawi 14 leh phalna loin vawi 2 thu ka sawi tawh,” a ti.