Cyclone Arnab thawk turah Odisha leh AP inbuatsaih nasa

India khawchhak lama Odisha leh Andhra Pradesh vaukam chu Cyclone Arnab na tak thawk turah thuneituten ‘nunna chan leh thil chhia a tlem thei ang ber’ a awm theih nan sikul an khar a, tuipuia chhuah an khap a, rescue team tam tak inrintir an ni bawk.
India Meteorological Department (IMD) chuan Bay of Bengal laili chhak leh chhimchhaka deep depression insiam chuan khawthlang pan zelin tunah cyclonic storm ‘Arnab’-ah a chang tawh tih an sawi.
Andhra Pradesh leh Yanam vaukamah, Nilaini chawhma hian Bapatla leh Visakhapatnam inkarah darkar khata km 140 thlenga chak thli nen khawmual a lut dawn niin an chhut lawk.
Ram khawpui berah chuan National Crisis Management Committee-in cyclone atana inbuatsaihna thlirin Cabinet Secretary T V Somanathan-a hovin Andhra Pradesh, Odisha, Telangana, Chhattisgarh leh Puducherry, union home ministry leh IMD hotute an thukhawm a, Uttar Pradesh khawchhak leh Bihar thlengin ruah a tam dawn niin an sawi.
Somanathan-a chuan agency hrang hrangte chu nunna chân an awm lohva thil pawh a tlem thei ang ber a chhiat theih nana tan la turin a chah a, chhia a awm a nih pawhin ni tin mamawh ang chi chu siam that hmasaka neih turin a chah bawk.
National Disaster Response Force (NDRF) chuan cyclone kalkawngah team an dah a, a tula thawk chhuak belh thei tur team an inring bawk tih an sawi.
“Army, Navy, Air Force leh Indian Coast Guard atangin lawng leh thlawhna nen rescue & relief team an inpeih tawh a. Indian Coast Guard hian lawngte chu vaukamah a hruai chhuak a, tuipuia lut rih lo turin an ti hlawm,” tiin sorkar thuchhuahin a tar lang.
Andaman & Nicobar Islands-ah chuan Thawhlehni thleng khan sikul chawlh puan a ni a. Odisha sorkar pawhin Nilaini leh Ninganiah chhim lam district paruk – Ganjam, Gajapati, Rayagada, Malkangiri, Koraput leh Nabarangpur sikul, college leh anganwadi centre chawlh a puang.
State sorkar chuan district parukah hian tuipuia sangha man a khap a, khualzinte pawh tlang, tuikhawhthla leh tuikhuaha kal a khap bawk a. Chief Minister Mohan Charan Majhi-a chuan hmun hrang hrangah minister pariatte chu cyclone thawk tur laka invenna atana inbuatsaihna enpui turin a tir bawk.
NDRF, Odisha Disaster Rapid Action Force (ODRAF), Fire & Emergency Services leh police atangin rescue team inrintir an ni.
Odisha Disaster Management Minister Suresh Pujari-a chuan, “In rinawm lo leh hmun hniama khawsate chu hmun himah sawn an ni a. Nau pai laite damdawi inah dah lawk an ni a. Upa, naupang leh rualbanlote tan ruahmanna bik siam a ni bawk,” a ti.
Cyclone centre an siam peih vek tawh tih a sawi a. Sorkar hna thawkte chu chawlh lak an phal lo va, chhawmdawl leh chhanchhuah hna atan control room an siam tawh bawk.
Andhra Pradesh sorkar chuan district 20-ah chhawmdawlna atan Rs vaibelchhe 27 a ruahman a.. Bapatla, Krishna, Konaseema, East & West Godavari, Kakinada leh Anakapalli district-te tan chhawmdawl leh inbuatsaih nan Rs. vaibelchhe hnih theuh pek an ni tih Andhra Pradesh State Disaster Management Authority chuan a sawi.
Cyclone kalkawnga zirna in zawng zawng khar vek a ni a. Tuipui kam khar a ni a, vaukam hrula kawngpuite pawh Thawhlehni chawhnu atang khan khar a ni bawk.
Nau pai lai 4,711 chu primary health centre, community health centre leh damdawi inah dah lawk an ni a. Sangha mantute pawh tuipuia awm lo tura tih an ni.
Thuneitute chuan Tandava, Raiwada, Yeleru, Tammileru, Yerrakalava leh Tadipudi tuikhuahte a khah ngei an ring a, hei vang hian a hnuaia awmte chu inralring turin an ti bawk.
Cyclone Arnab hian West Bengal-a district eng emaw zatah pawh Nilaini atanga Zirtawpni inkarah ruah tam tak a thlen dawn niin IMD chuan a sawi a, hei vang hian state sorkar chuan sangha mantute chu tuipuia chhuak rih lo turin an ti.