Bungraw phurtuten kawng chhia siamthat thuai ngen

Khamrang leh Thingdawl bul kawng chhe lutuk chu siamthat a nih loh chuan lirthei hmanga Mizoram mamawh bungrua lakluh chawlhsan rih mai an duh tih bungraw phurtuten an sawi.
Sumdawng pawl hrang hrang inzawmkhawmna, Mizoram Merchant Association (MIMA) hruaitute nen an inkawmnaah Mizorama lirtheia bungrua phurluttute chuan Khamrang leh Thingdawl bul kawng chhe lutuk chu siamthat ran dan Mizoram sawrkarah thlensak turin an ngen a. He kawng chhia avang hian bungrua a thleng harin, tun ang reng a nih chuan bungraw phurh pawh chawlh rih mai an duh thu MIMA hruaitute hnenah hian an sawi.
Hemi chungchang hi Zirtawpni khan MIMA hruaitute hian PWD changtu chief minister hnenah an thlen nghal a ni.
Transporter ho hian Aizawl chhunga bungrua thlenpui hi chawhma dar 11.00 atanga chawhnu dar 3.00 inkar chauh phalsak an ni a, traffic jam nasa nen an indah zo hman thin lo tih an sawi bawk a. Bungraw dah theih hun hi tlai dar 4.00 thleng phalsak an nih theihna’n MIMA hi hma lakpui turin an ngen a, an hian Traffic SP hnena thlen an tum a ni.
MIMA hruaitute hi August 17 khan MNF party hruaituten an office-a tlawhin an inkawm a. MIMA chuan chief minister-in sumdawngte harsatna thlen a ngaihtuah sak thin avanga an lawm bakah Commerce minister Dr R Lalthangliana’n office sakna tur hmun a pek avangin an lawm hle tih an lo hrilh a. Chutihlaiin Council of Minister-in Shop and Establishment Acts Mizorama hman tura a pass chu an duh lo hle a, Mizoram tan hman a that loh thu an lo thlen. Hetiang thil ngaihtuah ngun ngai bikah chuan a nghawng tur sumdawngte rawn a, sawiho thin a that thu leh he Acts hi engti zawng maha hman an tum loh thu an lo sawi a ni.