WC champion thar Spain

Pathianni tlai khan FIFA Women’s World Cup final khelh a ni a. Inkhel hmuhnawm takah Spain chuan si khat faiin England an hneh a, hmeichhe world Cup-ah a vawi khat nan an champion.
Stadium Australia, Sydney-a final khelhah Spain in an khel tha a, hun tawp thlengin chak phu zawk niin an khel tluang. Inkhel tir lamah England an khel tha a, goal thun hmasa zawkah an tang teuh hle. Lauren Hemp chuan Rachel Daly hnen atanga ball a dawn chu fuh takin a pet a, goal ngei tura ngaih a nih laiin goal bar a pet per hlauh a, a hun tha neih a hlah. Vanneihthlak taka an him hlauh hnuin Spain gol thun theihna hun tha an nei zui nghal a, Alba Redondo pet tha tak chu ‘Best goalkeeper’ a thlan zui tak Mary Earps chuan tha zetin a dang a, England a chhan him.
An hun tha an hlah ve ve hnuin England player pawimawh Lucy Bronze chuan mual laiah ho takin ball a hloh. Bronze tihsual hi Spain in an chhawr tangkai a, an khingpuite an nawr let thut. |ha taka an nawr tlang hnuin left back Olga Carmona chuan minute 26-naah fuh zetin a pet goal a, hmahruaina goal a thun. Chawlhlawk hnu lamah Spain in goal thun belh theihna remchang an nei a, hand ball vangin penalty an hmu. Penalty hi Jenni Hermoso chuan a pet a, an chakna nemnghehna tur ni mah se si nghak Earps chuan fuh zetin a lo dang thung.
Penalty hlah mah se Spain an khel tha chhunzawm a, hun pangngai tawp hnua minute 13 ngawt an khelh belh lehah pawh an goal an venghim a, Olga Carmona goal thun chakpuiin World Champion an ni zui ta a ni. Hmeichhe World Cup-a Spain an champion hma hiam mipa leh hmeichhe World Cup-a champion kawp thei awmchhun chu Germany chiah an ni a. England hneha Spain nulate an champion tak vangin Spain hi mipa leh hmeichhe World Cup-a champion kawp thei pahnihna an ni. Final-a Spain chakna goal thuntu Olga Carmona khan semi-final-a Sweden an hneh tum khan hun tawp dawn hnaihah chakna goal a lo thun tawh a. England lakah Spain a chakpui leh bawk a, inkhel pawimawhah a che ropui hle.
Pathianni a Women’s World Cup khelh zawh takah Spain champion theih nana thawhhlawk tak Aitana Bonmati chu best player-ah thlan a ni a. England si nghak Mary Earps chu si nghak tha berah thlan a ni bawk. Manchester United si nghak Earps hian Women’s Euro-ah England a champion pui vangin FIFA’s Best Goalkeeper for 2022 chawi-mawina a lo dawng tawh bawk. Japan tan goal nga thuntu Hinata Miyazawa chu topscorer a ni a. Champion thar Spain player zinga naupang ber kum 19 mi Salma Paralluelo chu tleirawl tha berah thlan a ni bawk.
Hmeichhe World Cup final khelh hma hian inrinni khan pathumna zawn a ni a. Brisbane Stadium-ah Sweden chuan a thlengtu Australia chu si hnih faiin an hneh a, pathumna an ni.