Champion thar O’Malley

Champion thar O’Malley
Pathianni zing khan UFC 292 neih a ni a, kawnghren inchuhnaah Sean O’Malley chuan bantamweight champion Aljamain Sterling chu awlsam takin a hneh a, champion thar a ni.
Bantamweight-a champion lai Sterling hian a kawnghren chuhpuitu Sean O’Malley lakah bul a tan tha a, round khatna tirah a nawr buai nghal. Chiang taka hnek fuh zawnin a khingpui dan beh a tum a, a dang bet zo lo. A khingpui talchhuak umzuia a bawhnat lutuk vangin chesual zawkah a tang ta tlat thung. Bul tan tha lo O’Malley hian ngam taka nawrtu Sterling hi chiang zetin a lo hnek fuh siah a, a hnel tlu. A hnek tluk hnuin a nawr zui nghal chat a, chiang leh na taka a hnek fuh zawn hnuin referee in inhnek a titawp a, knockout a hnehna changin O’Malley chu champion thar a ni ta a ni.
Rin loh taka tlawm ta zawk Sterling chuan O’Malley nen intum nawn leh ngei a duh thu a sawi a. Pathianni zinga a khingpui O’Malley lakah talbuai ngei mah se a la tlawm lo a, referee Marc Goddard chuan fight a titawp hma lutukah a ngaih thu a sawi tel bawk. O’Malley lakah tlawm a, a kawnghren hloh Sterling hian UFC-ah fight vawi 23 a hmachhawn tawhah vawi li a tlawm ta chiah a. Champion thar Sean O’Malley khan UFC-ah vawi 17 fight a hmachhawn tawh a, tlawm zawkah vawi khat a tang tawh.