Naupang thah thu puang

Chin hriat loha awm Mamit Chhimveng naupang Lalremruata (11) thia chhar chungchangah kut tuar nia rinhlelh a nih avanga police-ten an rinhlelh an hren zinga pakhat zawk chuan a thah a ni tih a sawi.
He naupang thihnaa pawikhawihtu nia rin mi pahnih hren zing ami R Lalrinchhana (21) chuan Lalremruata hi a thah a nih thu police hmaah August 25 tlai khan a puang a. A tuk zing dar 1.00 velah Central Jail-ah dah turin kalpui nghal a ni. Amah hi Lalremruata te nen lirthei part dawra thawk ho an ni a. Police hmaa a sawi danin, a bialnu nen an inthen vanga rilru hah chuan zu a in a, an riah dawr hi a lum avangin Remruata pawh hi kekawrte nen chauh a mu a, a rui rilru tawt chuan hemi zan dar 10.00 vel hian Lalremruata gamchha hmangin a rek hlum ta niin a sawi. A tuk zingah dawra thawk ve midang lokalte hnenah Lalremruata hi a la mu niin Lalrinchhana hian a sawi a. Hemi hnu hian a ruang hi an dawr kudam-ah a thukru a, hemi zan dar 11.30 velah puana tuamin a scooty hmangin a ruang an chharnaah a dah ta a ni.
Thudawn danin, Lalremruata hi hursualna lam zawnga khawih chu a ni lo niin a lang a, hei vang hian Lalrinchhana pawh hi hemi kaihhnawihah hi chuan thubuai siamsak tel a ni lo a ni.
August 18 atanga chin hriat loha awm Lalremruata s/o Lalvulmawii, Mamit Chhimveng hi ni 4 hnu ah a ruang hmuh a ni a. A ruang awm danah kut tuar ni ngeia ngaih a nih avangin Mamit Chhimveng All NGO chuan chhuichian an phut a, chhui a nih loh chuan an thiam dan anga hma an lak tur thu an sawi. Police-te hian mi 10 vel thu zawtfiahin mi pahnih an hreng a, an hren pakhat zawk hi chu he pawikhawihnaah hian a inhnamhnawih lo tih finfiah a ni. Lalremruata hi pianphunga rualbanlo a ni.