Kawng chhia thawmthat ngiat kawng dan titawp

Mamit district-a kawng leh lei tha lo siamthat phuta lirtheia eizawng intelkhawmin kawngpui an dan chu sawrkar aiawhte nen inremna siamin Inrinni tlai dar 4.50 khan kawng dan an titawp.
August 21 atanga Mamit district-a kawngpui leh lei chhia siamthat ngiata National Highway 44A kawngpui dan chungchangah Mizoram sawrkar aiawhin PWD (Highways) chief engineer Vanlalmuana, Mamit addl. DC V Laldinsanga, All Commercial Vehicle Mamit president leh Sub Hqrs YMA Mamit president ten hming ziahhnanin inremna an siam.
Inremna ang chuan, Darlak Bailey bridge thuamthatna tur National Highway Division I-in estimate a siam chu August 2023 chhungin sawrkarah thehluh a ni anga, estimate sanction a nih hmain PWD-in lei part hrang hrang a neihsa a lakhawm anga, phai lama chah ngai chu estimate sanction a nih veleh a chah nghal ang. Thal tui a tlem a, diversion road siam theih a nih hunah Bailey bridge dawhthat hna thawh tan nghal a ni ang.
NH 44A project balance work estimate siam mek chu September thla chawhma chhunga siam zawha sanction turin sawrkar laipui ministry-a thehluh tum a ni anga, ministry-in a sanction ve leh tender chhuah a, a thawktu tur thlan a ni ang. Darlak – Tuidam concrete pavement-a lirthei tlan dan tur ruahmanna siam turin hemi lama thuneitute ngen an ni ang.
Mamit – Bairabi kawng hi lirthei awlsam zawk a kal theihnan August 2023 chhung hian a chhe zual lai thawmthat hna thawh tan a ni ang. Dampui kawng lei min kumhlun lai hi lirthei tlan theih turin a tul anga thenfai a ni ang.