KMTTP-a zangnadawmna pek loh chhanah Forest-in PWD puh

Kaladan Multi-Modal Transit Transport Project (KMMTTP) sialna atana ram petuten zangnadawmna an la lak theih loh chhanah Mizoram Forest department chuan Mizoram PWD a puh.
Lawngtlai District Land Owners Association hian kumin August 1 atang khan KMMTTP kawngpui sialin an ram a tihchhiat zangnadawmna hmuh ngiatin Chhimtuipui Wildlife Division Office-a Deputy Conservator of Forest office kai tur an dan bakah KMMTTP kawnga an ram chhungah hnathawktute chetvel an remti lo a ni. Hetihlai hian sawrkar atang chuan tun thlengin thu lawmawm dawn an la nei loa, an thil phut hi nawr zui zel an tum tih an sawi.
Principal chief conservator of forest-in tunhnaia Mizoram chhimlam district pathum – Lunglei, Lawngtlai leh Siaha a tlawh tumin Siahaa ram neitu aiawhten an hmuhnaah Mizoram PWD-in dan 32 an bawhchhia a, Mizoram Forest department chuan zangnadawmna an hmuh turah engmah harsatna an siam lo tih a sawi niin, Lawngtlai District Land Owners Association hian an sawi. PCCF thusawi hi an pawm lo tih sawiin, Forest department-in mimal ram chhungah environment tih chhiat zangnadawmna lak phet an tum chu an mutan ber a ni zawk tih an sawi a. Forest department hi Gauhati High Court-in ram neitu dik tak a tih chian mi 138-te ram atang hian inhnukdawk se, zangnadawmna an hmuh tur chu a fel mai an beisei tih an sawi a ni.