Intiamna ang tihhlawhtlin phutin school khar tintuah
2018 MLA inthlan dawna an intiamna anga MNF sawrkarin adhoc grant -in- aid a a hlankai phutin lumpsum aided higher secondary school pakua chuan vawiin, August 29 atang hian tiamchin awm loa school khar an tum.
Mizoram Govt. Lumpsum Aided Higher Secondary School Association (MIGLAHSSA) hnuaia kum 2008-a lumpsum aided-a dah school 9 – Thingsulthliah HSS, Farkawn HSS, Zobawk HSS, Zawlnuam HSS, West Phaileng HSS, E. Lungdar HSS, NE Khawdungsei HSS, Phullen HSS leh Tuisualral HSS hian an thil phut nawrna atan August 28 khan sikul kal tho si a lehkha zir loin sawrkar an lo ngaichang tawh a, an thil tum thulh phahna khawp thu lawmawm an hriat loh avangin August 29 atang hian, an School Managing Board hriatpuina in tiamchin awm loa sikul khar chunga sawrkar thu ngaihchan an tum tih sawi a ni.
The Aizawl Post zawhna chhangin MIGLAHSSA hruaitu pakhat chuan, sawrkar hmasa hunlai khan ‘upgradation’ phut hian kawng hrang hrangin hma an lo la tawh a, 2018 inthlan dawn hnaiha hma an lak leh laiin, tuna minister Dr R Lalthangliana nen an inkawm a, an sawrkar chuan an thil phut hi an tihhlawhtlin tur thua tiamin, beiseina sang tak nen sawrkar thar an lo thlir tih a sawi.
MNF sawrkar hlimah chief minister an hmu a, School Education minister pawh an dawr chhunzawm a, beisei nei taka an lo nghah laiin, kar kalta mai khan an thil nghahah beisei tur a awm hmel loh thu an hre ta niin a sawi. Sawrkar lam chhuanlam chu sum indaihlohna vang a ni tih a sawi bawk.
“Sawrkarin sum a nei lo an ti a; sawrkar aiin kan zirlai nu leh pa, zirtirtute leh khawtlang hian kan nei lo zawk tawh a ni,” thudawnna chuan a ti a. Khawtlangin theih ang anga kum 20 chuang school an lo kalpui tawhte enkawlna atan hian cheng vaibelchhe 6 velin an thil phut hi a tihhlawhtlin mai theih nia an ngaih thu leh, chu chu sawrkar tan chuan thil harsa tak nia an ngaih loh thu a sawi.
Heng school 9 zinga a tam zawk hi inter state leh international ramri atanga teha Mizoram khaw tawp lam an nih thu leh, tunhnaia ram buai avanga raltlante pawh an zirlaiah an kawl tel thu a sawi bawk.