Lei dawh chimah contractor lakah complaint siam tum

West Bengal BJP atanga Sairanga rel kawng tur lei dawh chim enfiaha lokal chuan contractor ABCI lakah a tul a nih chuan complaint an siam tur thu a hrilh.
Sairang Zero Point-a rel kawng dawh mek chim vanga vanduaina tawkte chungchang ngaihvenin W Bengal BJP atangin an hruaitu, Ministry of Rural Development-a Disha Committee member ni bawk Ziarul Haque chu Aizawlah a rawn kal a. Thawhtanni khan Civil Hospital Aizawlah he lei chim vanga hliam tuar enkawl mekte tlawhin an chhungte a kawm a. Hliam tuarte hnenah BJP West Bengal leh Mizoram chu an mamawhna apianga anmahni pui tura an awm thu a hrilh. Helai hmuna rel kawng dawhtu contractor – ABCI pawh Aizawla an office, ISPAT office-ah hmuin lei chima vanduaina thleng chu engineering & technical fail vang a nih an rin thu an hrilh.
He vanduainaa thite ruang chhe tawh takin tun Pathianni khan Malda West Bengal thlengin, ruangte hi thlawhnaa an thawn loh chungchangah contractor-in an tih tur an tih loh thu leh hnathawktute himna titha tawk lo leh thihna hial thlennaa contractor hmalak danah a tul ang zelin dan anga contractor laka complaint an siam tur thu a hrilh bawk.
BJP Mizoram leh West Bengal hruaitute chuan vanduaina thlen avanga chhanchhuah hna thawktu zawng zawng, mitthi ruang senghawi chungchangah Sairang khawtlang inpekna, Mizo mipui leh NGO tlawmngaihna chu lawmawm an tih thu an sawi a. Chhiat tawhna avanga mi inpete chungah mitthi chhungte leh hliam tuarte aiawhin BJP West Bengal chuan lawmthu an sawi tih a sawi a ni.