Dan lalna sawrkar kan siam dawn – Dr Lallianchhunga

Congress thupuangtu Dr Lallianchhunga chuan an party-in dan lalna ram sawrkar an siam dawn a, dan hnuaiah an huaisen hle dawn tih a sawi.
Champhai South bial a tlawhnaah MPCC Media department chairman ni bawk Dr Lallianchhunga chuan ramria insumdawn tawn chungchangah Congress party sawrkar loh chhung reilote ah Myanmar nena insumdawn tawnna kawngah harsatna a thleng nasa hle tih a sawi a. Covid leng ziaawm hnu ah pawh Mizoram lam gate khar a la nih reng laiin, Manipur Moreh-a insumdawn tawnna gate chu an hawng daih tawh tih a sawi. Ramri gate-a Assam Rifles biakthiam ringawt a tawk loa, sawrkar laipui au thiam kan mamawh tih a sawi.
Lok Sabha inthlanah Congress party kaihhruai INDIA-in BJP paihthlain sawrkarna a siam ngei dawn nia a lan avangin Mizoramah pawh ‘Tualvungi ko thiam’ Congress party a sawrkar a ngai tih a sawi. “Congress party chuan a ngaihna kan hria. Dan lalna ram sawrkar kan siam dawn a, dan hnuaiah kan huaisen hle ang,” a ti.
Party dangte aia Congress danglamna chu, policy rintlak an nei thin chu a ni, tiin, tang puihna hnuaiah dinchhuah tuma tan latute puihna tur cheng vaibelchhe tam tak budget-ah an dah dawn tih a sawi. “Kuthnathawktute fairel bel thleng phak tur ‘Tang Puihna’ policy hi kan tihlawhtling ngei dawn a. Dinchhuah tuma tan la duh thalaite tan pawh ruahmanna siam a ni. Zirlai lehkhathiam thei si, sum harsatna tawk te tan ‘Tang Puihna’ hmangin sawrkarin tanpuina pek a tum,” Dr Lallianchhunga hian a ti. Congress party-in tih an tiam chu an tihlawhtling thin tih a sawi bawk.