BSNL hmalakna sawipui

Mizoram Telecom Advisory Committee chu an chairman, Lok Sabha MP C Lalrosanga hoin Thawhtanni khan kumina a hmasa ber atan Aizawlah an thukhawm.
BSNL Mizoram hotute hmasawnna thu sawipuiin, mipui rawngbawltu an nih angin, vantlang harsatna leh mamawh thlira an hmalakna mipui hriattir zel turin MP hian a chah. BSNL-in hotu thar, principal general manager Arumaya Dakua a nei chu lawmawm a tih thu sawiin, Mizoram puma inbiakpawhna titha tura hma an lak mek leh ruahmanna an neihte chu tipuitling thuai se a duh tih a sawi.
Mizorama 4G service pekna tur hma lak mek chu sawrkar kum kal laia tipuitling turin a chah a. Nakin zel atana 5G hmanga inbiakpawhna neih tuma hma la tura fuihin, sawrkar laipui lamah a tul dan anga hma lakpui a inhuam tih a sawi.
BSNL hotute chuan Mizoramah telephone exchange 37 leh landline connection 5747 an la nei tih an sawi a. Broadband connection hman lai 2094 an neih bakah mobile connection 260814 an pe mek tih an sawi. BSNL hian national highway zaa 81 leh state highway zaa 54 mobile-in an huampha a; 4G hmanna atan district 11-ah tower 60 bun an tum mek tih an sawi. Fibre hmangin district pali ah FTTH connection 6036 an pechhuak a, khawl leh hmanraw thar hmanga pek belh zel an tum tih an sawi bawk.
MP hian an hnathawhna kawng hranga harsatna an tawhte sutkian chungchangah BSNL hotute chu Mizoram leh sawrkar laipui lama thuneitute hnena thlensak a tum thu a hrilh a. Mizoram khaw hrang hranga hma an lak mek leh hmachhawp hrang hrang an neih chu mipui hriattir tam tur leh state dang atanga hotu leh hnathawktu Mizorama rawn thawkte chu theihtawp chhuah turin a chah.