Motorcycle-a inphur chunga thlawk thui record siam

Australian stunt performer nupa Jake Bennett leh Mel Eckert te chuan kum 20 chuang record ding tawh, motorcycle-a inphur chunga thlawk thui record an rawn khum ta tlat mai. An nupa hian motorcycle-a inphur chungin meter 37.10 (feet 121 leh inches 8) a thui an thlawk thei a, 2000-a Jason Rennie leh Sian Phillips te record, meter 29.26 (feet 96) chu an rawn khum ta a ni.
Jake, kum 34, leh Mel, kum 30, te kum nga an innei tawh a, an huaisen nupa khawp mai. Jake hi stuntman niin, thil hlauhawm tak tak a lo paltlang tawh thin a, tum khat chu a stunt tihnaah motorcycle-a mi phur chunga thlawh (jump) a tel a, hemi an zirna lamah hian an nupaa inphur chunga motorcycle-a thlawk thui ber record siam theih an inbeisei ta a ni.
A tirah chuan Jake hian amah a zir tlauh tlauh phawt a, thil rit a ak tel thin a, a thil rit ah chua tirit telh telh a, a nupui, Mel-i rihna ang vel thleng ak chungin a thlawk thin a, a duh ang tawka a tih theih hnuah record siam turin an che chhuak dun ta a ni.
Jake chuan, “Ka stunt tih tawh zawng zawnga hlauhawm leh hautak ber niin ka hria. Kum 20 chuang record ding tawh han khum chu a nuamin a hlimawm takzet a ni. Hetiang kan puitlin thei hi inchhuanna tham tur chu a ni ve e,” a ti.