Minute 1 a inkuah ngun ber record siam

David Rush hi chu kan hre lar tawh, Guinness World Record a siam deuh reng mai a, tunah hian record 250 chuang a siam tawh a, kuminah 300 tlin hman a tum a, tun tumah hian Youtuber Josh Horton nen record an siam a, an record siam chu minute khat chhunga inkuah ngun ber niin, vawi 153 an inkuah hman! A hmaa hetiang record chu Anthony Anderson leh Darius Rucker ten Carpool Karaoke: The Series a an siam niin, vawi 138 an inkuah hman.
Hetiang record siam tur hian pakhatin a kawngah a kuah ang a, pakhatin a nghawng (dar)ah a kuah ve thung tur a ni. An inkuah ang a, an inthlah leh ang a, an inkuah leh thin ang. Mahse, an inthlah hian an ban chu sir lamah an lak thlak kher a ngai lo va, an taksa insi loa an awm erawh a ngai thung a, an inkuah laiin an awm a insi chat ang a, an kutin an kuah chat bawk tur a ni thung.