Adhir Ranjan Chowdhury an hnawl hmak

Union Law Ministry chuan kar kalta Inrinni khan President hlui Ram Nath Kovind kaihhruai member pariat awmna Lok Sabha, Assembly, municipality leh panchayats te inthlan a ruala neih theih dan enfiahtu tur a din a.
Panel-a oppositon leader awm chhun Lok Sabha a Congress leader Adhir Ranjan Chowdhury chuan member atana ruatna hnawlin committee chu ‘an thutlukna chiangsa’ tiin a sawi a. Media kaltlanga committee member atana ruat a nihna pawh hre chauh a nih thu a sawi.
Chairperson bakah hian committee member zingah Home Minister Amit Shah, Chowdhury, Leader of the Opposition Rajya Sabha ni thin Ghulam Nabi Azad, Finance Commission chairperson hlui N.K. Singh, senior advocate Harish Salve, Lok Sabha Secretary General hlui Subhash C. Kashyap, leh Chief Vigilance Commissioner hlui Sanjay Kothari te an tel a ni.
Law Minister Arjun Ram Meghwal pawhin special invitee angin committee-ah a tel ang a, Legal Affairs Secretary Niten Chandra chu panel Secretary a ni thung ang.
Committee hian Constitution a Representation of the People Act amendment siam dan tur a rel ang a, hei bakah hian inthlan a ruala neih theihna tura dan leh rules siamthat ngaite an enfel bawk dawn a ni.
Lok Sabha-a Congress leader in Amit Shaha hnena lehkha a thawnah, “Thutlukna tur chiangsa committee a tel hnarna hi inthlahrunna ka nei hauh lo,” tiin a ziak lang a ni.
Hei mai bakah hian inthlanpui neih hma thla tam pawh a awm loh laia tun anga ruahmanna siam tumna chu rinhlelhawm leh kalpui ngaihna awm lo leh rem lo nia a ngaih thu sawiin sorkar thil kalpui tum danah ngaihthat lohna a neih thu a sawi bawk a.
“Hei mai bakah hian Rajya Sabha a Opposition Leader ni mek chu telh a ni lo bawk a. Hei hi Parliamentary democracy hmuhsitna angah ka ngai a ni,” tiin a sawi bawk.
Tuna sorkar hmalakna thar hian Law Commission 170th report a ‘kum tina inthlanna neih ziah mai hi tihtawp tur a ni’ a tih chu behchhanah a hmang a ni.