Sanatana Dharma avanga inhnialna nasa

DMK chief MK Stalin fapa minister ni bawkin Sanatana Dharma chungchang a sawi hmangin Opposition bloc INDIA te chuan ‘Hinduism an hua’ tia sawiin ‘kan heritage (thil rochun) an bei a ni’ tiin Union Home Minister Amit Shah chuan a sawi.
Inthlan mai tur Rajasthan-a BJP te Parivartan Yatra hawnna Dungarpur a neihah Shah chuan thusawina neiin BJP te chuan ruling Congress paihthlaa State inthlana chak ngei tumin theihtawp a chhuah mek a ni, a ti bawk a.
Home Minister chuan tun hnaia Udhayanidhi Stalin thusawi chu INDIA bloc tena ‘vote bank politics’ leh ‘appeasement’ tactic an kalpui leh mek a ni tiin a sawi bawk.
Tun hnaiah Chennai-a writers’ conference neihnaah Tamil Nadu Chief Minister MK Stalin fapa Udhyanidhi thusawi chuan boruak a siam hat a. Udhayanidhi Stalin chuan ‘Sanatana Dharma idea chuan idea of social justice a kalh avangin nuaibo ngai a ni’ tiin a sawi a. Sanatana Dharma leh natna hrang hrang dengue leh malaria-te chu a khaikhin bawk.
A thusawi thehdarh chuai chuai a nih hnuah BJP leader-te chuan ‘genocide’ kalpui tura innawrna tihiala sawiin Udhayanidhi Stalin chu na taka beiin INDIA member tinte pawh DMK leader thusawi chu an pawm em tiin zawhna an siam bawk.
Sawiselna chhang letin Stalin chuan Sanatana Dharma chu ‘caste leh religion behchhana mipuite thendarhna principle a ni’ tiin a sawi zui bawk a.
“Sanatana Dharma zuitute nuaichimit turin ngenna ka siam hauh lo. Sanatana Dharma a zung chawpa phawi hi humanity leh mihring intluktlanna kenkawhna zawk a ni. Ka thusawi thumal tinah ka ding nghet tlat a. Rahbeha awm leh thlauhtlak te, Sanatana Dharma avanga tuarte tan ka ding nghet tlat” tiin a sawi zui bawk.
Karti Chidambaram, Congress leader leh Home Minister hlui P Chidambaram fapa ni bawk chuan Udhayanidhi Stalin thusawi chu thlawp tlat thungin Sanatana Dharma hi “Caste Hierarchichal Society code bak a ni lo” tiin a sawi a. “Sanatana Dharma duh zawng te hi chu tun hma hun thlahlel an ni a. Caste hi India anchhia zawk a ni,” tiin a sawi.
DMK leh INDIA leader pahnih thusawi chu nataka chhang thungin Amit Shah chuan, “Tun hnai ni hnih chhungin INDIA hruaitute chuan he ram heritage leh Sanatana Dharma te chu an hmusit a ni. Congress leh DMK top leader te fapate chuan vote bank politics leh appeasement duhin Sanatana Dharma nuaibo an sawi a nia,” tiin a sawi bawk.
Home Minister chuan kum 2010 a Congress leader Rahul Gandhi thusawi radical Hindu pawl te chu terror organisation Lashkar-e-Taiba te ai an hlauhawm tawh zawk a tih pawh a sawi chhuak tel bawk a.
“Rahul Babu-an Hindu organisation te chu hlauhawm em em Laskhkar-e-Taiba te ai pawha hlauhawmah a sawi a. Rahul Babu, Hindu organisation leh Lashkar-e-Taiba te i khaikhin a nia. I Home Minister pawhin ram chhungah ‘Hindu terror’ an awm a ti bawk a nia” tiin Shah chuan a sawi.
He thu hi Home Minister hlui leh Congress leader Sushil Kumar Shinde an Hindu terror chungchang a sawi a sawina a ni a. Shinde chuan he thu hi Jaipur party meeting neihnaah a sawi a, mahse, a thusawi a zuk leh zui a ni.
Rajasthan rally neihnaah Shah chuan Sanatana Dharma chu mipuite thinlung luahtu tiin a sawi bawk a. “Modi a chak chuan Sanatana rorelna a thleng ang a. Sanatana chuan mipui thinlungah rorelna a lekkawh a ni,” tiin a sawi bawk a. Prime Minister chuan India chu Constitution duh danin a kal ang a ti, a ti bawk.
Congress te chu Ayodhya a Ram Temple sak dang char charah puh bawkin Union Home Minister chuan, “Grand Ram Temple chu Lord Ram pianna ngeiah January thlaah peihfel a ni ang. INDIA alliance-in a dang thei lo. Congress-in kum tam tak a dan a ni,” tiin a sawi.
Hei bakah hian Home Minister chuan yatra-a hawn chuan 2,500 km a awh ang tia sawiin ni 19 chhung hun hman a ni ang, a ti bawk a. “Assembly constituency 52 a paltlang ang a, small meeting tum 156 a awm bawk ang a, meeting lian 54 a awm ang. Zawh fel a nih meuh chuan Ashok Gehlot sorkar chu an tlafel tih a chiang ang,” tiin a sawi bawk.
Shah chuan Ashok Gehlot sorkar chu corrupt tia sawiin hmeichhiate pawh himin i siam thei lo a ti bawk a. “Ashok Gehlot sorkar hi eirukna turu takin a chiah a ni a, hmeichhiate pawh an humhim thei lo. Ni tinin sexual harassment case 19 vel zet State chhungah a thleng reng a ni,” tiin a sawi bawk.