Zirtirtuten an nihna hrechiang se…

Naktuk September ni 5 hi India ramah chuan Zirtirtute Ni atan hman a ni thin a. Zirtirtute Ni-ah hian a tobul hi kum tin sawi chhuah thin a nih avangin kan hre bel hlawm hle tawhin a rinawm. Zirtirtute nihna pawimawhzia leh an hlutzia te kan inhrilhin zirtirtute chawimawina niah kan hmang thin a, hei hi a hluin a ropui hle a ni.
Mipui lamin zirtirtute nihna, pawimawhnate leh hlutnate an sawi thin lai hian, anmahni zirtirtute zawk hian an nihna hi an lo hrechiang lovang tih a hlauhawm letling zawk a. An nihna leh dinhmun hi an hriatchian loh chuan an nihna ep zawngin thil a kal daih thei.
Tun hnaiah India chuan thla leilung zirchiang turin thlaah khawl a kap kai a, hetianga theihna sang hi khawvel ram pathum chauhvin an la ti thei a, India chu a palina a ni. Eng vanga thlaa inkapkai thei nge kan nih? kan tih chuan, a bul chu ‘zirtirtute’ an ni.
India ram scientist rualte hi lehkha an zir tan tirh atangin zirtirtuten thahnem ngai takin zirtir lo se, ‘hlawh ka hmu tho alawm’ tiin zirtirtuten thahnemngai duh lovin inthlahdah viau se, aikal te la kual mai mai se, thlaa inkap kai thei tur khawpa thiamna paw chhuak thei zirlai hi an lo chhuak thei lo ang a, khawvelah dinhmun palina hi kan hauh kher lovang.
Mizoramah hian zirtirtute hian zirlai an chherchhuak tam tawh hle, hetih rual hian a quantity lama hma kan sawn zel laiin, a quality lamah hian hma kan sawn hleithei lo niin a lang a, hei hi zirtirtute hian eng tiatin nge an vei tih hi zawhna pawimawh tak a ni awm e.
Stage hrang hrang, primary school atanga university thlengin zirtirtute intelkhawmna pawl (association) an awm a, inkhawmpui lian an hmang thin a, hetiang nikhua hian zirna quality leh Mizoram dinhmun chungchangah eng tiangin nge hma an lak thin tih hi thil pawimawh tak a ni bawk awm e.
Zirtirtute chu ram leh hnam innghahna lungphum an ni a, mihring chher chhuaktu an ni a, an pawimawh kan tih rual hian, anmahni zirtirtute zawk hian an hlutna leh dinhmun pawimawhna an hriatchian phawt hi a pawimawh. Zirtirtu tha chu, midang kalkawng tiêng tura mahni kangral sathaukhawnvar ang hi an ni, tih a nih kha.