Real tan Bellingham vul chhunzawm zel

Englishman zinga La Liga Player of the Month atana thlanchhuah hma-sakber Jude Bellingham chuan August thlaa a award dawn chhunzawm thei turin September thlaah pawh chetthat a chhun-zawm leh nghal a, Inrinni zanah Real Madrid chak-na goal khung lehin, an mikhual Getafe lakah Spanish giants hian 2-1 hnehna changin table-a an hmahruaina an sawhnghet.
Santiago Bernabeu inkhelah hian mikhual chefuh hmasa zawkin, tan atanga minute 11-na lekah Real striker hlui Borja Mayoral chuan amah hnawltute lakah goal a khung a, an siphurh hi Madrid club-in chawlhlawk hmain an sut hman lo!
Second half tan hnu lawkah Joselu chuan 1-1 a nihna goal thun bawk mah se home team hian goal dang an khungbelh thei lo a, an kawtkaia point hnih hloh then tura ngaih an nih hman thuak hnu hun pekbelh minute ngana a kal mek laiin England midfielder Bellingham hian Real chakna goal a thawh leh a; Bernabeu khelmuala a goal vawikhat thunna niin, ti hian, season kal laia Real game li khelh tawhah kum 20 mi hian goal a la thun ziah a, a goal nga khawl tawh hmangin La Liga top scorer a ni mek.
Madrid hian league match li an khelh tawhah hnehna chang fai vekin point 12 nen hma an hruai chhunzawm zel a, he thu buatsaih lai thleng hian point ngain hma an hruaifal mek a ni.
Getafe lam khan karliamta Zirtawpni maia Manchester United atanga loan-a an sengluh striker Mason Greenwood an la chhawr hman lo.
Real midfielder Bellingham lamah kirleh ila, Spain leilung a thlen hnua Bernabeu club rohlu ni nghal leh fans duh rawn hlawh rang zet hi Madrid chuan Borussia Dortmund atangin euro maktaduai 103 (USD 110.96 million)-in an lei a, a chetthat dan azirin a man hi euro maktaduai 30-a la sang leh thei turin inremna an ziak a, a club thar tana a game hmasa palia goal nga thun thei hi a inhliamte a nih loh chuan Spanish club hian a man hi an pekbelh ngei dawn niin a lang!
Inrinni kha Real Madrid tana ni pawimawh niin, pound maktaduai 500 zet senga kum 2019 atanga an thuamthat Bernabeu hawn ni leh an khelmual ropuia kum thum chuang an inkhelh tawh loh hnua game an khelh leh vawikhatnaah England international avangin hnehna lawm tur an nei.
Club president Florentino Perez chuan khawvela stadium ropui ber a lo tiam tawh angin Bernabeu thuamthar hi a ropui nangiang a, mahse, an home groun-a an kirleh zanah Real fans-in chak lawm tur an nei zo lo tep a, an hero thar Jude Bellingham avangin khel-mual hawn thar boruak pawh a dik thei hram a ni!
Real Madrid history-ah Bellingham hi Real tana khelh hmasak vawilia goal thun vek thei pathumna niin, Pepillo (1960) leh Cristiano Ronaldo (2009)-te hnung a zui ve ta a ni.
Madrid hian Karim Benzema hmunruak luahtu atana an beisei Kylian Mbappe an sengluh zawh loh leh tak hnuah Carlo Ancelotti hian goal khung lama inbanlek tur player rintlak duh khawp a nei lo a, mi thar pahnih Joselu leh Brahim Diaz-te chuan Brazilian winger pahnih Rodrygo leh hliamin a tihbuai mek Vinicius Junior-te zawm tawh mah se he squad-ah hian forward pali chauh an la awm a, tlarhma bawh kawnga duhkhawplohna a len mek laiin midfield atanga goal khung thei Bellingham lo lang ta hi Italian coach tan chuan thawk huaina tham a tling awm e!