Record thar nen nipui transfer khar a ni

Kumin nipui insuan hun chu khar fel a ni ta a, infiamna huanga sum chet vel dan zirchiangtu Transfermarkt tarlan danin kumin hian khawvel huap transfer window vawikhat chhunga sum hman tam ber record thar siam niin, player lei leh hralhna mana sum chevel hian pound vaibelchhe 6.56 tehreng a kai chho!
A hma chiaha record (£6.51bn) chu kum 2019-a siam kha niin, kumin hian record thar kan hmu ta a ni.
Moises Caicedo mana Chelsea sum thehchhuah pound maktaduai 115 chu British transfer record thar niin, Premier League bik hian tun nipui thawt chhung khan pound vaibelchhe 2.1 an hmang tling a, league malkhaia sum hmang hnem ber an ni.
British transfer record dinglai chu August thlatir lam khan khum daih tawh niin, Blues-in Ecuadorian midfielder Caicedo mana Brighton hnena sum an pekchhuah khan record thar a puitlin.
Kumina khawvel huap transfer record thar kan hmuh theih chhan pakhat nia lang chu pound maktaduai 728 thehchhuak tling Saudi Arabia lamin an thawhhlawk vang hi a ni a; Saudi Pro League hi English top flight dawta sum seng hnem niin, pathumna chu pound maktaduai 682 phawrhtu Italian Serie A club-te an ni.
German Bundesliga club-te chuan pound maktaduai 598 hmangin, French Ligue 1 (£594m) leh Spanish La Liga (£342m)-te’n an dawt.
Saudi Arabia ram sawrkar hnuaia din Public Investment Fund hausa zet chuan an rama club lian zual pali an thunun a, an team enkawl pali Al-Ittihad, Al-Nassr, Al-Hilal leh Al-Ahli tihte tan chuan player thar leina tur sum an ui lo ngang mai a, Cristiano Ronaldo hnu lamah kumin nipui chhung hian Neymar, Allan Saint-Maximin, Jordan Henderson leh Europe-a hming hraw pui pui dang an hruailut bawk.