Insawifiah turin Stimac an hriattir

Karliamta Inrinni khan All India Football Federation (AIFF) chuan an inremna pela a sawi loh tur sawia an puh senior men’s team head coach Igor Stimac chu insawifiah tura hriattirna (show-cause notice) an pe.
Asian Games, World Cup Qualifiers leh Asian Cup khel tur player a dapkhawm laiin Stimac hian national camp zawm tura an player kawlte chhuah tha duh loah Indian Super League (ISL) club-te a puh a, a duhthawh khawp mai a, Indian football-in a tanpuina an mamawh takzet a nih chuan zep nei loa engkim a sawichhuah kilh kelh a ngai tih a tarlang tel.
Croatian defender tawngkam hi AIFF lam chuan an paidai mai thei lo a, an inremna bawhchhiaah puhin, harsatna a tawk a nih chuan vantlang hriata sawichhuak mai loin federation a sawipui zawk tur a nih thu leh an inremna a bawhchhia tih an thuchhuah siamah an tarlang a, federation lamin an bawhzui tur thu an tarlang tel.
AIFF show-cause notice hian Stimac a tibuai lem lo niin a lang a, a duh anga inthlakdanglam a awm loh chuan an ram lama haw a hreh loh thu a sawi-chhuak hial a ni.
ISL club-te demna a sawichhuah lai hi September ni 7 atanga Thailand rama khelh tan tur ni li awh King’s Cup tournament atana Indian team inbuatsaih lai tak a ni.
Tunhnaia camp lut tur hian player 28 thlanchhuah atangin a tirah mi 12 chiah an in report thei a; club lamin an player kawl lai chhuah an phalsak loh avangin national training camp hun pawh sawnhlat a ngai hial a ni!
East Bengal, Kerala Blasters, Mumbai City, Jamshedpur FC, Punjab FC leh Odisha FC-te chu camp bultanna nang hman tura player chhuah phal lo club-te niin, chu chuan India team management a tibuai hle a, Stimac-a thinrim a insum buai duh bik ta lo a ni ber.
August thla khan Stimac hian ISL club-te hnenah World Cup Qualifiers leh AFC Asian Cup atana inbuatsaihna camp zawmtir turin ngenna a lo pe vek tawh a, zawm a hlawh tehchiam loh hnuah Croatian hian social media kaltlangin thuchhuah rorum tak a siam zui ta hmiah a, Indian football chu kawng pengthuam pawimawh taka ding mek a nih thu sawi chungin club-te chu penchhuak hoa national team thlawp turin a sawm a, a bik takin, tournament lian an hmachhawn dawn lai phei chuan team thlawp zual turin a ngen.
Thailand ram tourney zawh hian China-ah Asian U-23 qualifiers khelh chhunzawm leh nghal tur niin, he hmuna inlan team hi September ni 19 atanga tan tur Asian Games lamah an inlan zui leh ang.
Thla thar October hian India chuan Malaysia ramah Merdeka Cup khel lehin, 2026 World Cup leh Asian Cup joint qualifiers pawh November atanga tan tur niin, kumthar January atangin Asian Cup khelh a ni bawk ang.