Khualchhawn thiam zir….

Mizoram hi tourism promote-na lamah chuan a hnufual pawl kan nih a rinawm a. Information technology te a lo chak ta a, inphochhuahna dawhsan tha tak social media platform hrang hrang avangin khualzinmite pawhin Mizoram an rawn hmelhriat ve tan ta a. Tunhnaiah hian hnamdang, Mizoram dung leh vang fang kualtuten an youtube channel-ah Mizoram hlimthla an phochhuak thin a, hei hi a ram leilung fate tan pawh hmuhnawm leh bengvarthlak tak tak te a ni hlawm.
Hetianga hnamdang khual zinmiten kan ram chhung an rawn fan hian, an kalnaah mi tu tu te emaw thu han zawha han biaksawm an han tum thin a, mahse khual kan lo chhawn dan (reaction) hi a chhuanawm fahran lo thin hle a, he lamah hian inzirna tur kan la ngahin tanlak nasat kan la ngai hle tih a lo lang chhuak thin. (Khualchhawn thiam tak takte pawh an awm ve bawk a). Hei bakah hian, ei leh in kan buatsaih leh sawngbawl dan te, kawngsir leh bazara kan inzawrh dan leh, kan hmunhma hrim hrimte pawh hi, video atanga han en hi chuan a chhuanawm zawk zawk lo thin hle a, tlem tan han lak deuh a, lang mawi mai thei tur, lang thianghlim thei mai tur hi a ni deuh vek mai a. He lamah pawh hian tan kan lak a pawimawh hle tih a lang.
Ei leh in kan neih ang ang sawngbawl dan te, hmunhma vawn fai dante hi ‘kan khualchhawnna’ a ni vek mai a. Kan hmunhma heng ram mawina (scenery) leh sik leh sa (climate) nawmna te hi khualzinmite hiptu kan neih that a nih rualin, khualzinmiten tlangnel tak leh zalen taka hun nuam tak an hman theihna chu kan lo chiau-au dan (khualchhawn dan) hi a ni mah zawk a. Khualzinmite lo welcome dan kan thiam loh a, lo duat dan kan thiam loh chuan ‘potential tha tak nei’ inti inti chungin sum hnar atan tourism hi kan hmang tak tak pha dawn lo tihna a ni. Khualchhawn dan zir hi homework-a kan inpek a pawimawh dawn hle niin a lang.