US Open semi lut Muchova

Czech 10th seed Ka-rolina Muchova chuan Thawhlehniah 6-0, 6-3-a kum 33 mi ni tawh Roma-nian Sorana Cirstea sawp chungin US Open semi-final a lut a, American Coco Gauff nen final luh an inchuh ang.
Kumin French Open finalist Muchova tan tun hi US Open semi-final stage a thlen vawikhatna niin, Arthur Ashe Stadium-a veteran player a hneh hnuah a hun tawn chu mak a tih thu leh a awih loh hial zawk thu leh hnehna duh-awm a nih thu sawi chungin amah tantute chungah lawmthu a sawi nghal.
Muchova tum leh tur Gauff hian last eight inkhel dangah 6-0, 6-2-in Jelena Ostapenko a sawp ve bawk a; tualchhung tleirawl tan hlawh a hmachhawn tur chungchangah Czech Muchova chuan Zirtawpniah kum 19 mi mai ni lo home fans a ep tel a ngai dawn niin a lang.
Mihang player fak chungin inkhel hautak ni dawn mah se tantu ngah player hmachhawn chu a chak zawng tak a nih thu leh ani pawhin Coco laka inbeihna tak tak a lantir a tul tur thu a sawi.
American sixth seed Coco Gauff hian a Grand Slam title hmasaber tur a beisei leh mekna kawngah harsatna tawk loin quarter-final a paltlang a, Latvia nula Ostapenko lakah tan atanga a tawp thlengin a chungnung tluanchhuak a ni ber.
Gauff hian US Open inbuatsaihna Wa-shington leh Cincinnati lamah khan hardcourt title hlawhchhuakin, New York khaw tournament lianah pawh hian rinkai a ni chho zel a, Latvian 20th seed a paltlang anga awlsamin Czech Muchova a sawp leh thei dawn em kan thlir ang.
French Open champion hlui Ostapenko tan kumin hi US Open quarter-final a khelh vawikhatna niin, kumin Australian Open round of 16 lama a hneh hnu Gauff lakah a tlawm a, American mihang tleirawl hi kum 2001-a record lo siam daih tawh Serena Williams hnu lama American zinga US Open semi-final lut leh thei naupangber a ni.