Dawt hmanga a fund semah Duhoma puh

Serchhip bialtu MLA Lalduhoma chu dawt hmangin a MLA fund a sem niin MNF chuan an sawi.
MNF Media & Publicity sawi danin, Pu Lalduhoma hian kum 2021- 2022 chhung khan MLA fund atangin damlo kan nan Rs. 16,42,000 a hmang a. Damlo a kante hi an vaiin mi 30 an ni a, cheng nuai hniha kan mi paruk a neih bak chu Rs. 5000 chuang veka kan angin a insawi, tiin, party bil pual leh campaign-na rawngkaia damlo kanna duhsak bikte a pe teuh chu hriatthiam har an tih thu an sawi.
A bial chhung hmasawnna hna thawk tura agency dik tak, village council-te hmang duh loin, pawl phuahchawp hrang hrang – Zobawm Welfare Committee, Tualvung Veng Society, Tlangveng Welfare Committee, Varak Dil Welfare Committee, Zion Street Welfare Committee, Saphak Welfare Thenzawl leh welfare hming dang engemawzat a hmang niin Serchhip bialtu MLA hi an puh a. Hengte tan hian a MLA fund tam tham tak a pe tih RTI zawhna chhanna atanga an hmuh thu an sawi.
“Mipui sawrkar din tum a, thliar bik nei lo tura insawi thin ZPM super CM nih tumin dawt hmanga fund a sem kualte, pawl phuahchawp hmanga party bil mi a duhsak te, zin loh bill la duh leh Sihhmui khawtlang tui ru duhtu Pu Lalduhoma hi mipui tan rin ngam chi a ni lo a. Kalphung nghet leh rintlak, Pathian leh kan ram tan titu MNF-ah rinna nghat ngam turin mipui kan ngen a ni,” MNF Media & Publicity general secretary VL Krosshnehzova chuan a ti.