EMRS Fest 2023 nei mek

Sawrkar lapui Ministry of Social Welfare & Tribal Affairs hnuai National Education Society for Tribal Students (NESTS), Mizoram Eklavya Model Residential School (EMRS) Society leh Social Welfare & Tribal Affairs (SW&TA) Department Mizoram tangho buatsaih, 2nd Mizoram State Level EMRS Cultural & Literary Fest 2023, September 7-8 chhunga neih tur chu Ningani khan neih tan a ni.
He hun hawngtu Mizoram EMRS Society chairman, SW&TA minister Er. Lalrinawma chuan Mizorama EMRS hrang hrang 6 tana Cultural & Literary Fest 2023 buatsaih chuan rah tha a chhuah ngei a beisei tih a sawi a. Thu leh hlain thil a tih theih thu leh mi ngaihtuahna chena a thlak hlawk theih thu sawiin, Mizo history-ah ngei pawh thu leh hla avangin indona leh inremna hmuh tur a awm tih a sawi. Hnam nunphung leh ziarang zahpui loa chawinung zel tura chahin, “Hnam ziarang leh nunphung hloh chu hnam bo zia a ni a. Kan hnam zia humhim hna hi midang kuta awm ni loin keimahni mawhphurhna a ni,” a ti.
He hun hmanpuitu dang AMC corporator David Zohmangaiha chuan thu a sawi bawk.
EMRS Fest-ah hian cultural leh literary item hrang hrang hmangin intihsiak a ni dawn a. Mizorama EMRS 6 atangin zirlai leh zirtirtu 150 an tel. A ni khatnaah hian Literary Fest neiin, vawiinah Cultural Fest-a chhunzawm a ni ang.
SW&TA department hotute sawi danin, Mizoram EMRS hmasa ber chu kum 2008 ah Lunglei Pukpuiah din a ni a, kum 2015 ah Serchhip-ah, 2020 atangin hmun 4 – Lawngtlai, Chawngte, Tuipang leh Ngopa ah din a ni. 2023-2024 academic session-ah EMRS 6 ah hian zirlai 1210 an awm a ni. EMRS Lunglei leh Serchhip-ah class XII thleng zir theihin, a dang 4-ah class X thleng zir theih a ni.
Mizoram EMRS Society hi kum 2020-a din a ni a, tunah Mizoramah EMRS sak mek 5, No-aotla (Niawhtlang), Tlangnuam, Tlungvel, Bilkhawthlir leh Zawlnuam a awm. EMRS din tura sanction hmuh tawh, buaipui tulte tihfel veleha sak mai theih 6 a awm bawk.