Oscar nomination-a mi barakhaihtute

Oscar nomination an puang a, a kumtin danin rin loh taka nomination a lang an awm laiin, lan tura rinkai lang ta si lo pawh an awm leh nual.

Kumin Oscar nomination-ah hian Everything Everywhere All At Once langsar berin, nomination 11 a nei a, All Quiet on the Western Front leh The Banshees of Inisherin ten nomination pakua ve ve neiin an dawt a, Elvis biopic-in nomination pariat a nei a, The Fabekmans-in nomination pasarih neiin, Tar leh Top Gun: Maverick ten nomination paruk ve ve an nei a, Black Panter: Wakanda Forever-in nomination panga neiin, Avatar: The Way of Water-in nomination pali a nei ve bawk.
Kumin Oscar hi a vawi 95-na tur a ni tawh a, March ni 12-ah Dolby Theater, Hollywood-ah an sem dawn a, a show hi Glenn Weiss leh Ricky Kirshner ten produce-in, Weiss hi director a ni nghal dawn a, a tum thum nan Jimmy Kimmel-a’n show a host leh dawn bawk a ni.
Kumin Oscar-ah hian Taylor Swift chu ‘Where the Crawdads Sing’ a hla ‘Carolina’ avangin best original song-ah lang tura rinkai a ni nain, a lang ta lo. Swift hi Grammy lamah a chet theih ang huin Oscar-ah chuan a chu tehchiam lo a, Oscar nomination-ah hian vawi khatmah a la lang lo.

Mihang actress pahnih Viola David leh Danielle Deadwyler te chu Golden Globes leh Critics Choice lamah te langin, Oscar-ah pawh best actyress nomination-a lang tura rinkai an ni a, Viola Davis hi The Woman King changtunu niin, Danielle hi ‘Till’ changtunu a ni ve thung a, mahse, an pahnih hian nomination-ah an lang ta tlat lo
Oscar best actor tum hnih dawng tawh Tom Hanks pawh ‘A Man Called Otto’ film avangin best actor nomination-a lang tura rinkai a ni a, mahse, rin loh takin a lang ta tlat lo. Tom Hanks ji Elvis biopic-a Colonel Tom Parker a channa avangin best supporting actor-ah pawh a lang ta chuang lo.

‘Elvis’ chu tlang rin aiin a che tha a, nomination pariat a nei thei a, music biopic-ah chuan 1984 film ‘Amadeus’ hnuah Oscar nomination-a music biopic chetha ber a la ni. A changtupa, Elvis lema chang Austin Butler chu best actor nomination-a lang tura rinkai a nih ang ngeiin a lang ta ngei a, ani hi award pawh dawng thei tura rinkai ber pawl a ni.

Kumin award sem tur nominaton an puan tawh hrang hranga la lang miah lo Everything Everywhere all at Once changtunu Stephanie Hsu chu best actress nomination a lang ta nawlh a, Aftersun changtupa Paul Mescal pawh rin loh takin best actor nomination-ah a lang nawlh bawk.

Tom Cruise chu Top Gun: Maverick avangin best actor nomination a lang tura rinkai a nih laiin a lang ta lo a, mahse, producer lamah nominate a ni thung a, Top Gun: Maverick hi best picture-ah nominate a ni. Cruise hian Oscar-ah acting category-ah nomination a la nei lo tluang ta zel a ni.

Babylon changtute Brad Pitt leh Margot Robbie te chu award dang nomination-ah an lang tha viau a, mahse, Oscar nomination-ah erawh an lang lo dun ve ve tlat mai.