BPL awm lohna state-ah BJP-in Mizoram siam tum

Prime minister Narendra Modi-a’n Agriculture leh Farmers Welfare Scheme engemawzat a duan chhuah hmangin Mizoram chu BPL (below peverty line) awm tawh lohna state a siam an tum thu BJP State president Vanlalhmuaka chuan a sawi.
Zirtawpnia an party office-a inkhawmah BJP Mizoram president chuan, nitina kan ei leh in thawkchhuaktute chu loneitute leh kuthnathawktute an ni, tiin, mihring kan dam khawchhuahna atana kan kaw chhunga lut zawng zawng thawkchhuaktu loneitute leh kuthnathawktute chu retheihna bawih ata an talchhuah theih nan Narendra Modi chuan theihtawp a chhuah a. Agriculture leh farmers welfare scheme engemawzat a duan avangin India ram chu khawvela economic power panganaah min hlangkai, tiin a sawi.
Prime minister-in farmer’s scheme a duan hrang hrangte chu a sawi chauh nilo, a taka hman tangkai a nih theih nan leh Mizorama kuthnathawktu zaa 75-te dinhmun chu a taka chawikan a nih tur thu Vanlalhmuaka hian a sawi a. Farmer-ten leirem an rah theih hun hunah Mizoram chu thawhchhuah ngah ber state kan nih bakah India ram state zinga leiba nei tlem ber kan nih tawh tur thu sawiin, BPL awm lohna state-a Mizoram an siam theihna turin BJP chu Mizoramah an sawrkar ngei a ngai tih a sawi a ni.