India tlawm ni herchhuak ve ta nge nge

Thailand-a ram pali inelna Kings Cup-ah India chuan Fifa ranking-a an aia sang fe Iraq an hmachhawn a, an match hnuhnung 12-a tlawm nei miah lo India hian ropui taka khelin Asia khaw-mualpuia team khawng hi an hneh lek lek a, penalty petah vanduaiin final an lut zo ta lo a, Lebanon nen bronze medal playoff an khel ang.
Chiang Mai khaw inkhelah hian sawi hlawh takin Arab team hi an chak a tih theih a, penalty shoot-out hma hun pangngaia Iraq penalty hlawhchhuah dan chuan sawi a hlawh a, hun tawp dawna inhnial theih tak penalty an hlawhchhuah avangin Iraq chuan an siphurh sutin 2-2 a ni a, penalty shootout hmanga chak zawk zawnnaah India an vanduai ta a ni.
Pathumna inchuh match khelh zawh Pathianni zanah Iraq leh tournament thlengtu Thailand chuan final an khel dawn a, final match hi 700th Anniversary Stadium-a khelh tur a ni.
Captain Sunil Chhetri tel lo India hian an aia ranking nei sang zawk Iraq laka an hnehna hmasaber tur an hlenchhuak teuh hle a; minute 79 thleng India hian 2-1-in hma an la hruai a, chu tah referee chuan ho angreng takah Iraq lam chu penalty a hlawhchhuahtir ta tlat a, box chhunga India striker pahnihin ball kang inchuhna lama Iraq striker Aymen Ghadhban an chepbet chu penalty hamna tlakah a ruat ringawt a, a lan danah clear-cut penalty han tih tur hi a ni lo hrim hrim a, mahse, referee-in a ham miau a; penalty hlawhchhuaktu Ghadhban bawk hi pet turin a penchhuak a, an siphurh sutin 2-2 a ni a, penalty shootout hmanga pawhthen an ngai.
Penalty petah hian Iraq tana chhuihtu zawng zawngin an petluh vek laiin India lamah Brandon Fernandez chuan goal ban a petper a, Iraq hian 5-4 hnehna nen final an lut hram a ni.
India tan tun hi kumina an tlawm vawi-khatna niin, hnehna chang zo lo mah se referee thutlukna avang chauha chak zo ta loa ngaih Indian team hian fak an hlawh.
Iraq hi Fifa ran-king-ah 70-na niin, Blue Tigers hi 99-na an ni a, home-ah pawh ni lo, an thiampuipa leh captain huhang ngah Chhetri tel lo lehnghala ranking sang zawk an sual tawk em em hian Igor Stimac hnuaia Indian football hmasawnna a tarlang kan ti thei ang.
Ningani hma khan India leh Iraq hi vawisarih intum tawhin, tah chuan Arab team hi vawiruk an chak a, vawikhat an inhnehtawk a; team pahnih intum hnuhnunber November 2010 international friendly-ah khan sihnih faiin Iraq an chak.
Ningani semi-final lehlamah a thlengtu Thailand chuan 2-1-in Lebanon an hneh ve bawk.