Argentina an chak nghal

September 8, Zirtawp zing atang khan South America khawmual atanga World Cup 2026 khel tur zawnna neih tan a ni a. World Champion Argentina chuan Lionel Messi goal thun hmangin hnehna an chang a, point thum an hmu nghal. Inkhel dangah Colombia in hnehna an chang ve bawk.
World Champion Argentina hian Mâs Monumental-ah Ecuador an mikhual a, an mualah khel tha viau mah se goal an thun har hle thung. An khingpuite nawr betin, goal thun theihna hun tha nei thin bawk mah se an vannei thei mai lova, goal post leh goal bar vawi hnih an tih per. Lautaro Martinez a vanduai chhunzawm a, goal thun theihna hun tha a neih a chhawr tangkai thei lo. Hun rei tak goal an thun theih loh hnuin minute 78-naah Lionel Messi chuan mawi zetin free-kick a pet goal a, hmahruaina goal a thun ta nge nge.
Messi goal thun hnu leh Messi thlak a nih hnuin Argentina hian goal thun theihna hun tha vawi hnih an nei zui leh naa an chhawr tangkai thei chuang lo. An vanneih ni nise hnehna lian chang thei an ni naa an mualah si khat faiin an chak thei ta tawk a ni. An mualah an beisei anga result tha nei thei bik lo mah se point thum an hmuh tho vangin Argentina tan bul tanna chhe tak erawh a ni bik lo.
Zirtawp zinga CONMEBOL World Cup qualifiers inkhel dangah Colombia chuan Metropolitano Roberto Meléndez-a an mikhual Venezuela chu minute 46-naa Rafael Borré goal thun hmangin an hneh a, point thum an hmu ve bawk.
Argentina leh Colombia an chak laiin inkhel dangah Paraguay leh an mikhual Peru te chu goal awm lovin an inhneh-tawk ve thung.