Political party-ten candidate tifel hnai

Kumin kumtawp lama Mizoram State Assembly neih turah political party hoin bial hrang hranga an candidate tur an tifel mek a, party lian pathum chuan an tifel thawkhat tawh.
Assembly bial 40 awmah MNF party chuan bial 38-a ding tur an tifel tawh a. Assembly speaker Lalrinliana Sailo-a’n MNF ticket-a MLA a nih mekna Chalfilh bial leh Aizawl South-II bial chu candidate an la tih chian lohna nia ngaih niin, ding tawh lo tur ni insawi Home minister Lalchamliana bial Hrangturzoah chuan MNF secretary Lalremruata Chhangte an dah dawn nia thu dawn a ni. Speaker ni lai Lalrinliana Sailo hi MNF party ticket pek a ni tawh dawn lo nia sawi a ni bawk.
ZPM party chuan Tuichawng bial tih loh, bial 39 chu an tifel tawha ngaih a ni a. An ni party hi inchingfel hma ber tura ngaih an nih laiin, candidate thlak an nei leh zauh thin a ni.
Congress party pawh MNF ang tho in bial 38 chu tifel thawkhata ngaih an ni a. MLA an neih mekna Palak bialah an sitting MLA chan tura ngaih an ni a, a thlakna tur an zawng mek tih thu dawn a ni. Tuichawng bialah pawh candidate an la tifel lo nia sawi a ni.
Hetihlai hian political party dang – BJP, PC leh AAP chuan tun thlengin an party ticket-a ding tur an la sawichiang loa, BJP leh PC hian sawrkara tel tur zing ami an nih thu an thuchhuah leh party hruaitute atangin an lo sawichhuak fo tawh thung.