Hlemhletna laka fimhlim CM atan kan chhawpchhuak – ZMC corporator

ZPM-in chief minister atana an chhawpchhuah chu hlemhletna laka fihlim, ram damna tura rintlak a ni tih corporator C Lalchhandami chuan a sawi.
Inrinni zing khan Bawngkawnah ZPM party-in street campaign an nei a. Heta thu sawitu AMC corporator C Lalchhandami chuan ram retheihna lak ata zalenna kan hmuh theihna turin chief minister tha neih ve chu Mizoramin a phu a, eng thilah mah intodelh loa kan la awm chu ngaihtuah ngun a ngai ta tih sawiin, “Sem policy hmangin politics kan khel a, mi tlemte hausakna, mipui nawlpui retheih tial tialna ramah kan ram hi kan siam a ni,” a ti.
MLA tha tak tak kan nei chungin a hruaitu lu berin a zir miau loh avangin hma kan sawn pui hleithei lo tih a sawi a. ZPM chuan chief minister atan hlemhletna laka fihlim leh a tak taka ram veitu Pu Lalduhoma an chhawpchhuak a, he ram damna tur hian a rintlak, tiin, ring ngam turin mipui a sawm.
ZPM MLA candidate-te chu eirukna lama fihlim turin an intiam vek, he ram siamthaa hmalam pan tura an ngaihtuahna zawng zawng sengtu, chief minister tha hnuaiah ram siam tak tak turin an rintlak dawn tih C Lalchhandami hian a sawi.
Kan environment chu neitu nei lo ang maia suasam a nih thu sawiin, thalaite chu kan ram chhiat leh thatah mawh kan phur tih a sawi. “ZPM hian enviroment policy mumal tak kan nei a, kan ram thatna tur hian enchhin kan ngam. Kan thalaite hian ram hmasawnna tak tak chakin an tuihal a, party ruihchilh leh atchilhna lak ata chhuak a, he ram thatna tura hnathawh kawr hakpuiah kan sawm che u. ZPM kan lo sawrkar a, ram tan hna ropui kan thawk chuang lo a nih chuan min thlak leh ngam turin mipui ka sawm a ni,” a ti.