Thuneihna chan nan eng pawh ti duh ti

Congress leader Rahul Gandhi chuan Paris a zirlai leh academics te nena inkawmhona an neihah BJP te chu nataka sawiselin thuneihna an chan theih nan chuan eng pawh tih huamin an chetdanah Hindu nihna nena inlaichinna engmah a awm lo tiin a sawi.
Paris khawpuia social sciences institution lar Sciences PO University a inkawmhona neihah kum 53 a upa Opposition leader chuan topic hrang hrang a Bharat Jodo Yatra kalpui te, Opposition alliance tena India democratic structure humhim nana thawhho an tumna te, global order inthlak mek leh issue pawimawh dang dangte sawina a nei a ni.
Opposition-te chuan ‘soul of India’ tana beih nasat an inpeih at reng thu sawiin India chu tuna ‘harsatna’ nasa tak ata a talchhuak ang tiin a sawi bawk a.
“Gita ka chhiar tawh a, Upanishads tum tam ka chhiar tawh a, HIndu lehkhabu tam tak ka chhiar tawh a, BJP te thiltihah Hindu-na thil engmah a awm lo, a awm lo takzet” tiin Gandhi chuan India rama “Hindu nationalism” sang zel tia sawi chungchang zawhna a chhang a ni.
“Hindu lehkhabu khawiah mah, Hindu mi tu hnen atang mahin nangmah aia chak lo zawk te tichhia in chet i la tur a ni tih ka chihar lovin ka ngaithla miah lo. Chuvangin he ngaihdan, Hindu nationalists tih hi thumal dik lo a ni. Hindu nationalists an ni lo. Hinduism nena inzawmna an nei lo va. Engti kawng pawha thuneihna neih an tum bur a, thuneihna chang turin engpawh an ti vek ang. Mi tlemte te thuhnuaia awm tir vek tum an ni a, chu chu an nihna dik tak niin Hindu na thil nena inzawmna an nei lo” tiin a sawi bawk.
Congress president hlui chaun Indian 60% te chuan Opposition an vote thu sawiin ruling party BJP te chu 40% te chauhin an vote tiin a sawi bawk a.
“Hei vang hian majority community ten BJP an vote tih hi a dik lo. Majority community te hian BJP te aiin min vote tam zawk” tiin a sawi bawk a.
India-Bharat inhnialna chungchangah Constitution chuan India chu “India chu chu Bharat, Union of States a ni” tiin a sawi a ti a.
“Heng state-te intelkhawm chuan India emaw Bharat an siam mai a ni. A pawimawh lai ber chu heng State-a tel mipuite ngaihdan leh duhdan ngaih pawimawh a ni a, an aw chhuah te hmehmih tum tur a ni lo,” tiin a sawi bawk.
Paris session hi Brussels a tlawh hnua European city a tlawh pahnihna niin inkawmhona te Professor Christopher Jaffrelot, Director of the Centre of International Studies in kaihruaiin Arancha Gonzalez, Dean of the Paris School of International Affairs, Sciences PO chuan chairman hna a thawk thung.
Gandhi hian hetiang deuh chiaha inkawmhona hi French capital a INALCO University-ah pawh nei tawhin heta tang hian Rotterdam, the Netherlands a pan leh dawn a ni.