Huaisen chawimawina dawngtute hlan

Sawrkar laipuia Ministry of Home Affairs-in mi huaisen, midangte nun chhan nana mahni nunna thapa chechhuakte chawimawina, Jeevan Raksha Padak Award 2022 hnuaia chawimawina chi khat, Uttam Jeevan Raksha Padak dawng tura a thlan, Kolasib district ami, Lianzalama leh Lalchhuanliana (L), Kolasib Diakkawn ve ve te hnena chawimawina chu Ningani khan a hlan.
Kolasib bawrhsap John LT Sanga chuan Jeevan Raksha Padak chawimawina leh kumina Mizoram atanga dawngte a sawi a. Kum 2021-a Kolasib-a vanduaina thleng khan ram mipui thin a thawng a, vanduaina tawkte an tuarpui takzet tih a sawi. “Vanduaina kara Mizo tlawmngaihna langchhuakah thian chhan thih ngam an lo zuang chhuak kha a ropuiin, an chhuanawm a, chu huaisenna rah chhuah chu an district-a huaisen chawimawina hlan tur mi pahnih kan neih phah a ni,” tiin, chawimawina dawngtute zahna chibai a buk tih a sawi.
2021 August 27 tlai khan Kolasib Diakkawna VL Siama Parte fapa pathum – Albert Vanlalhriata (40), Andrew Vanlalhruaia (40) leh William Lalduhawma (35) te unau chuan an in rel mek hnuaia an tuizem an tihfainaah vanduaina tawkin nunna an chan a. Tuizem chhunga an chetsual thu hriat a nih veleh mi tlawmngaiten anmahni chhanchhuah tuma hma la nghalin, Lalchhuanliana (60), Kolasib Diakkawn Salem Veng ami bazar kal haw chuan tanpui ngai an awm tih hriain, buaipui turin tuizem chhungah hian a lut ve a. Hetia mi nun chhan nana a chet chhuahna lamah hian chesual ve in, District Hospital Kolasib panpui ni mah se a nun a chan zui a ni. Lalchhuanliana (L) hi sipai bang, pa tlawmngai tak a ni a, midang chhan tumna lama a nun a chan avang hian Uttam Jeevan Raksha Padak award hlan a ni.
He thil thlengah vek hian a hunlaia Kolasib Vengthara khawsa, Lianzalama chu mi tlawmngai che chhuakte zingah telin, tuizemah hian a lut a. Tuizem chhunga chesual mi pali zinga pahnih chu tuizem chhung atanga a lak chhuah hnuah amah pawhin thawk a harsat tak avangin pawn lamah an pawt chhuak a, nikhaw hre loa awm zuiin, a nunna a chan phah tep a. Vanneihthlak takin a ni erawh a dam chhuak a ni. Midang chhan nana a nunna thapa a chet chhuah avang hian Uttam Jeevan Raksha Padak award hlan a ni.
Huaisen chawimawina dawngtu Lianzalama hi bawrhsap John LT Sanga’n he award-in a ken tel medal leh certificate a hlan a. Lalchhuanliana (L) chawimawina dawnin a ken tel medal leh certificate chu a nupui, Zachhingi hnenah Kolasib SP Lalrinawma Traite chuan a hlan. Sumfai hi a dawngtute account-ah Ministry of Home Affairs-in a thun tawh a, cheng nuai 1.5 a a ni.