Congress-in state leh central ah president an ruat fuh lo – MNYF V/P

Congress party chuan India ram leh Mizoramah president an ruat fuh loa, an tan dinchhuah ngaihna a awm tawh lo tih MNF Thalai vice president Zodinpuia chuan a sawi.
Zirtawpnia MNF Thalai Hqrs hruaitute thutkhawmah Zodinpuia chuan Congress party-in chuan India leh Mizoramah president an ruat fuh lo hle nia a hriat thu hi sawiin, an tan dinchhuah ngaihna a awm tawh lo niin a sawi. Congress party worker-te tan beisei tur dang a awm tawh loh avangin ‘Pathian leh kan ram tan’ tih thuthlung vuantu MNF-a thawhho puiah a sawm tih a sawi.
ZPM chu inngahna mumal neilo, mi pakhat ngaihdan leh thusawi anga kal mai thin an ni, tiin, “Hun rei tak zawlnei inlarna changchawiin Ni (sun) an tuipui a, tunah chuan ni eng hliahtu lukhumparh an sawimawi leh nasa tawh. Mizoram politics-ah innghahna lungphum nghet nei lo party a daih rei ngai lo,” a ti.
Kumin kumtawpa inthlanpui neih turah MLA bial 40 zirchian tawhna atangin bial tinah MNF dinhmun a tha hle tih MNF Thalai vice president hian a sawi a. Sawrkarna nghet tak neiin Pu Zoramthanga kaihhruai MNF-in hnehna a chang leh dawn tih a sawi.
MNF Thalai-in ram leh hnam tan thahnemngai taka hma an laknaah Mizote hnama dintu Pathian duhdanin an kal em tih inzawh fo a pawimawh tih sawiin, thudiklo hmanga politics-a inchirhthehna awm thin lakah MNF Thalai hruaitute chu fihlim turin a ngen. MNF chu Mizo hnam nunphung leh chin dan neih vawnghim a, chawisangtu a nih avangin Mizo culture chu MNF culture niin a sawi bawk.