Rilru lam puihna mamawh Richarlison
Tottenham striker Richarlison chuan international break zawha England a thlawhluh leh rualin rilru lama tanpuina (psychological help) a beisei dawn tih a sawi.
Brazil tana game 45 khela goal 20 thun tling tawh Richarlison hi Inrinni international match pakhata Brazil-in 5-1-a Bolivia an sawp thin khan hun tawp hmaa lakchhuah niin, khelmual a chhuahsan laiin a mittui tla hmuh tur a awm a, a hnuah a hun tawn sawifiahin, khelmual pawn lamah a duh loh dana thil a thlen thu a sawi.
Nikum nipui thawt laia Everton atanga London hmar veng club a zawm hnuah Richarlison hian Spurs tan game 40 khelin goal li chiah a la thun a, pound maktaduai 60 man phuin a la khelchhuak lo tiin a sawi theih ang!
Chutiang mi chuan Brazilian newspaper O Globo hnenah a harsatna tawh mek sawichhuakin, “Tunhnai thla nga liamta chhung hian khelmual pawn lamah hun khirh tak ka tawk a, chu chuan kan in lamah nghet takin min chenchilh a, ka sum chauh beiseitute chuan min hnaih ta lo.
“Tunah erawh thil a kal tluang chho dawn a, Tottenham-ah pawh ka chetha chho tawh dawn tih ka chiang a, mahse, rilru puthmang ngialnghet nei tur leh khawng zawka kirleh turin England ka luh hunah psychologist ka pan dawn a, rilru lama puihna ka beisei dawn a ni,” a ti.
Belem khaw World Cup qualifier-a Bolivia an mikhual tum khan Richarlison hian minute 71-a lakchhuah a nih hma khan goal thun theihna hun tha lutuk a bawhpelh a; Thawhlehnia Lima khawpuia sikhat faia Brazil-in Peru an hneh tum pawh khan minute 64-ah lakchhuah a ni a, club lama a chet fuh theih loh belhchhah tura national team lama a talbuai lehzel hian a rilru lam thlengin a nghawng niin a lang a, rilru doctor rawn a tum ta hial niin a lang.
O Globo tarlan danin Richar-lison hian tunhnai khan hun rei tak agent atana a lo rawih tawh Renato Velasco pawh a ban hial a ni.
Brazil chuan World Cup qualifiers-ah Venezuela (October 13) leh Uruguay (October 18) an tum leh dawn a, he match hnih hi rilru lama ngai a awh chhohlehna turah Richarlison tan pawimawh hle tura ngaih a ni.
Premier League lama pahnihna luah mektu Tottenham chuan Inrinni hian Sheffield United an mikhual dawn a, he match hi Brazilian tan pawimawh zual tura beisei a ni bawk.