SYS semi-final an hnaih

Shyam Steel MFA Under 17 League chu Nilaini khan round 3-ah khelh a ni a, Group B-ah SYS FC leh Mizoram Police FC ten hnehna an chang. Aibawk Zone FA an hneh a, Mizoram Police FC in 4 Brothers FA an hneh bawk si vangin SYS FC, Saidan in semi-final an hnaih.
SYS 3-1 Aibawk Zone
MFA Unfer 17 a champion lai SYS FC hian nilaini chawhma dar 10:00 khan Aibawk Zone FA an hmachhawn. Inkhel thunun tak chungin SYS hian 3-1 in hnehna an chang a, point thum hlutak an hmu.
Khelh hnih atanga point li hmu tawh SYS FC hian Aibawk Zone lakah bul an tan tha viau a, inkhel tir phat atangin hneh takin game an thunun. Ball chang tamin game thunun hneh viau mahse ni dang ang bawkin goal thun an harsat a, goal an thun hma thei lo. Fuh taka an khingpui tlarhnung an thiah hnuin Hmingthanzuala chuan minute 14-naah hmahruaina goal a thun.
Goal an thun hnuin SYS an khel tha zui viau a, an khingpuite hun tha an pe duh lo. Beisei anga goal lut a awm belh theih loh hnuin defender B Vanlalpeka chuan minute 40-naah corner atanga ball kal chu fuh takin a pet goal a, an goal hnihna a thun. SYS hian Thanthana leh Peka te goal thun hmangin 2-0 a hmahruai chungin chawlhlawk an hmang.
Chawlhlawk hnu lamah Aibawk Zone game a kang hret a, goal khat an thawkchhuak. SYS in tul lo taka penalty an chawi chu Lalrinnunga chuan minute 56-naah awlsam takin a pet goal a, an si phurh a sut then. An si phurh an sut then vangin Aibawk Zone hi phur thar bawk mahse SYS tan goal khat thun tawh Peka chuan minute 61-naah an goal thumna thunin an hmahruaina a tizau nawn leh. Player of the match a tlan zui tak Peka goal thun hnuin goal dang a luh belh thei tawh lova SYS FC in 3-1 in hnehna an chang zui ta a ni.
MPFC an chak
Group B a inkhel dang; inkhel ngaihven hlawh takah Mizoram Police FC chuan 4 Brothers Football Academy, Durtlang chu 3-2 in an hneh a, point thum hlu tak an hmu.
SYS laka tlawm tawh Mizoram Police FC hian SYS nen inhnehtawk a, group hmahruaitu lo ni tawh 4Brothers lamah an khel tha viau. An khelh that bakah an vanneih ni a ni tel a, penalty vawi hnih an hmuh chhawr tangkaiin hnehna hlu tak an chang. Khel tha tak MPFC hian penalty an hmu a, Lalsangpuia chuan penalty oet goal in minute 10-na lekah hmahruaina goal a thun.
Hma takah goal an thun vangin MPFC an phur a, na takin an khingpuite an nawr chhunzawm. Ball a khalh tlang hnuin Ngurthansanga chuan minute 21-naah awlsam takin a pet goal a, an goal hnihna thunin an hmahruaina a tizau. Si hnih an phurh hnuin 4Brothers in penalty an hmu a, an si phurh sut thenna hun tha an nei. Penalty an hmuh hi an khung thei lova, 0-2 a hnufual chungin chawlhlawk an hman phah.
Second half ah 4Brothers in bul an tan tha a. Lalpekhlua chuan minute 46-naah fuh taka pet goal in an si phurh a sut then. Goal an thun vangin phur hluai mahse an vanduai nawn leh a, penalty an chawi nawn leh. Penalty hi Ginmuansanga chuan minute 52-naah pet goal in an inkar a tizau nawn leh. Si hnih an phurh hnuin 4Brothers in goal thun tumin tan an khawh chiam a, hun tha nei bawk mahse uiawm takin an chhawr tangkai zo lova, MPFC lakah uiawm takin an tlawm zui ta hial ni.
Group B a inkhel dangah Dinthar FC leh Chanmari FC te 1-1 in an inhnehtawk ve bawk.
Group B-ah hian khelh thum atanga point 7 hmuin SYS in hma an hruai a. Dinthar FC leh Chanmari FC an hmachhawn zui leh dawn vangin Semi-final an hnaih.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More