January 26 – Republic Day chu Aizawl Theological College Durtlangah hman a ni a, he hun hmanpuitu minister Lalchhandama Ralte chuan hnam puanzar pawtparhin zirlaite leh thawktute hmaah thuchah a sawi.
-- Advertisement --
Minister chuan kum 1950-ah India ram chu mipuite ro rel theihna ram a ni, tiin, “Republic Day-ah hian British awpna laka zalenna suala inpete kan hrereng a, kan ram zalenna hnuaiah hian hruaitu hmasate duhthusam zuia khua leh tui tha tak nih hi kan mawhphurhna a ni,” a ti.
Mizoram sawrkar kal mek chu a din tirh phat atangin hriat lawk loh chhiatna chi hrang hrangin a bawhbuai tih a sawi a. Heng harsatnate hi hmachhawn mah ila, Engkimtitheia chuan Mizoram sawrkar chu heng karah hian hnehna nei thei turin a hruai tih sawiin, “Chakna min pe a, malsawmna min dawn tir bawk. Kohhran leh mipui tawngtaina azarah hmasawnna hna thawk theiin leh tum ram lam panin sawrkar hi a kal thei a ni,” Lalchhandama Ralte hian a ti.
ATC-a thawktute leh zirlaite hian minister hi an kawm zui a. Minister chuan academic session April – March 2023 chu India rampum kal dan a nih avangin thlak tumna a awm lem loh thu te, sawrkar primary school 320-ah pre school hawn a nih tawh thu leh hawn belh zel tum a nih thu te a sawi. Thalaiten hnathawh tur an neih theih nan LESDE department-in kawng hrang hrangin hna a thawh mek thu a sawi bawk.
Aizawl Theological College-ah hian Pathian thu zirlai BD, M.Th leh D.Th an awm mek a, zirlai 194 leh thawktu teaching leh non-teaching 43 an awm a ni.