Restricted tender leh SEDP leh hlawh lak tlai hi a inkaihnawih – ZPM working president

Restricted tender hmanga induhsakna uchuak leh SEDP an sem mek leh sawrkar hnathawk hlawh lak tlai chu a inkaihhnawih vek tih ZPM working president K Sapdanga chuan a sawi.
Thawhtannia Serlui bial North Hlimena an party hruaitute nen an inkawmnaah ZPM working president chuan, rinawm taka sawrkar hna thawk mekten thlabi hlawh an la hleithei loa, kum 13 thawh tawh hnuah pawh Samagra hnuaia thawkte chuan hlawh ngai ngar ngar an la a, chu pawh thla thum danah te an la thei tawk tih a sawi. “Hlawh tlai taka kan lak tak chhan hi thil dang vang niloin, tute emaw restricted tender hmanga an duhsak uchuak vang leh SEDP an sem mekte nen hian a inkaihhnawih vek. Sawrkar hnathawkte hian inthlan an nghakhlel em em a, an ni aia nghakhlel zawk chu thalaite an ni. Sawrkar tha kan tuak mek a, thalaiten an nu leh pa, party ruh em em thinte kalphung thar mipui sawrkar vote tawh turin an kar mek,” a ti.
Thil tha ti turin Delhi aiin a let tam takin chance kan nei tha tih a sawi a. Kalphung thar hmanraw hmangin Delhi lehpelh an tum dawn a, an theih ngei pawh an inring tih sawiin, “Kan lehpel thei lo a nih pawhin state dang ke pen rual tala kal ve theih erawh kan inbeisei tlat. Mipuiin ZPM min beiseina hi kan tihlawhchham thiang lo a, kan tu leh fa, thang lo thar zel turte tana chenna thlak ram din thar turin thahnemngai takin ke pen ang u,” K Sapdanga hian a ti.
An elpui party-ten ZPM leader Pu Lalduhoma nen inkar nei, harsatna nei anga sawiin, hmun hrang hranga an party mite zingah pawh lo awih tawk an awm leh thin tih a sawi. “Pu Duhoma nen kan inngeih lo dawn a nih chuan keimah hi a thiam lo zawk ka ni dawn tih lo ring nghal turin ka chah duh che u a. Lungrual taka kan kal hlaua phe phe thinte hi dawt sawi tir kan tum a ni,” K Sapdanga hian a ti.