World Bamboo Day hmang

September 18 kha World Bamboo Day a ni a, Mizoramah pawh Horticulture department chuan mau/rua tangkaina leh hlutna inhrilhhriat thar lehna ni atan a hmang.
World Bamboo Day hi Aizawlah Bamboo Development Board vice chairman Dr K Pachhunga, MLA hoin Horticulture department hian a hmang a. Department-a thawktute bakah Bamboo Development Board member te, Forest department hotute, mau/rua hmanga industry dintute leh mau chingtute nen hman a ni.
He ni denchhen hian Mizoram sawrkar hmalaknaa mau chin pun leh hman tangkai kawnga thawhhlawkte hnenah Horticulture department chuan lawmpuina a hlan a. Mimala mau chin lama thawhhlawk Lalnghakliana, Hmunpui Mamit district; a huhoa hmun khata mau chin lama thawhhlawk – Saiphal Zau (Hmunpui ram) a Zau neitu Ex-MNA Multipurpose Cooperative Society Ltd; Bamboo charcoal Briquette siamchhuah leh hralh kawnga nasa taka hma latu BT Enterprise Pvt. Ltd Durtlang (prop C Lalropuia) hnenah leh, ‘Best Bamboo Demo Plot’ a thlan Horticulture Centre Zawlnuam, Mamit district hnenah te lawmman hlan a ni a. Lawmman hian sumfai a kengtel.
Heng lawmman bakah hian State Bamboo Mission hnuaia furniture training zo tawh te hnenah certificate hlan a ni bawk.
Bamboo Day hmanpuitu MLA Dr K Pachhunga chuan mau chu a tuai atanga thil siamna thlengin Mizote leh khawvel hnam dang pawhin an hmang tangkai a, Mizoramah chuan tualto kan neih sa bakah sumchang atana hlawk tur kan ching pung mek tih sawiin, sumdawnna hlawk tak a la ni chho zel dawn tih a sawi a ni.
World Bamboo Day pual hian exhibition neih a ni a. Rua/mau atanga siam thil chi hrang hrang pholan a ni. Exhibition-ah hian National Institute of Design, Bengaluru leh National Institute of Design, Ahmedabad atangin designer leh master trainer an lo tel bawk.