Arsenal an chak, Chelsea an chak zo lo

Pathianni zana khan English Premier League-ah inkhel pahnih a awm a, London club lian pahnih Arsenal leh Chelsea te an inlan. Arsenal in Trossard goal thun hmanga Everton an hneh laiin Chelsea chu AFC Bournemouth lakah an chak zo lova, an talbuai chhunzawm zel.
Season tharah tlawm nei lova kal tluang mek Arsenal hi Everton hmachhawn turin Goodison Park-ah an leng lut. An khingpui Everton hi season thara che tha lo, chak la nei lo an ni mah se, Gunners hian Goodison Park-ah chak an harsat thin a. Goodison Park-a an len luh hnuhnung vawi ngaah vawi li ngawt tlawm zawkah an tang. An chet that lohna mualah hnehna chan ngei tumin tan an khawh a, inkhel hmuhnawm lantir mah se, goal khat bak an thun thei lo va, hlauhawm pawh an siamchhuak tam thei bik lo.
Everton an hmachhawn tum hian Arsenal manager Mikel Arteta chuan nipui bazar laia a lak luh si nghal David Raya chu EPL-ah a vawi khat nan a chhawr a, Raya hi a che tha nghal hle. Raya hian goal a ven thiam bakah ball a petchhuak tha thei viau bawk a, Aaron Ramsdale ai chuan team in an chhawr tangkai zawk ngei dawnin a lang.
Hmuhnawm taka inlan Arsenal hian goal thun thei mai lo mah se an tactic a tha thei hle. Short corner hmangin chance an insiam thiam thei hle. Hun tawp dawn hnaih lamah short corner hi an chhawr tangkai ta nge nge. Mawi leh fuh zeta ball an inpek kual hnuin Liandro Trossard chuan minute 69-naah mawi zetin a pet goal a, hmahruaina goal a thun ta nge nge.
Hmahruaina goal an thun hnuin Arsenal an khel tha chhunzawm a, an lamah hlauhawm siam thei lo turin an khingpuite an dang bet. Hun tawp thlengin Trossard goal thun hi an venghim tluan thei hlauh a, chak an harsatna mualah hnehna an chang ve ta nawlh a, point thum hlu tak an hmu.
Goodison Park-ah hnehna an chan leh tak vangin Gunners hian season tharah tlawm an la nei lova, khelh nga atanga point 13 an hmu a, palinaah an inhlangkai. An chungah hian khelh nga chhung chak zawn Manchester City bakah vawi 13 hmu ve tho Liverpool leh Tottenham te an awm. London hmar veng lama an elpui lian Tottenham nen hian Pathianni zanah an inhmachhawn zui dawn a. Inkhel hautak zawk an hmachhawn zui a ngai dawn.
Arsenal an chet that laiin Everton erawh an buai zui zel thung. Neitu thar nei mai tur Toffees hian seaspn tharah chak an la nei lova, vawi li ngawt an tlawm tawh. Khelh nga atangin point khat chiah an la hmu a, 18-naah an awm mek. Everton hian neitu thar an nei thuai dawn a, 777 Partners hnuaiah inthuam tharin, hma sawn an tum ang.
Pathianni zana inkhel hmasa zawkah nipui bazara sum seng hnem Chelsea chuan Vitality Stadium-ah AFC Bournemouth an hmachhawn a, goal an thun thei lo leh pek. AFC Bournemouth pawhin an mualah goal an thun thei bik lova, Blues nen goal awm lovin an inhnehtawk.
Chelsea hian manager thar Mauricio Pochettiona hnuaiah bul an tan chhe viau a. Vawi khat chiah an chak laiin vawi hnih tlawm zawkah an tang der tawh. Khelh nga atanga point nga hmu hramin 14-naah an awm mek a. An hnuai chiahah hian Bournemouth hi an la awm ve leh chhawng.