MLA pahnihin Tlabung kawng siam chak turin NHIDCL ngen

Lunglei to Tlabung kawng, National Highway 302 siam mekah Thorang bialtu MLA Zodintluanga Ralte leh West Tuipui bialtu MLA Nihar Kanti Chakma chuan NHIDCL chu chak zawka hna thawk turin an ngen.
MLA pahnih hian Lunglei- Lungsen- Tlabung Road siam mekah hian hnathawktu leh a enkawltute hnenah vawi tam chak leh tha zawka thawk turin an lo thlen tawh thin a. Heti chunga tun dinhmuna mipui nitin ei tur mamawh lakluhna thlenga harsatna a thlen tak zel avangin, chak lehzuala hnathawktute nawr turin Thawhlehni khan NHIDCL executive director (Projects) Virindra Kumar Jakhar chu Aizawla a office-ah an lenchilh.
NHIDCL hotu chuan an dinhmun tawn mek chu hrehawm a ti hle tih sawiin, contractor inthlak leh ruahtui avangin harsatna nasa tak an tawk a; Lungsen to Tlabung kawng dinhmun chu nitin an zawtin an buaipui reng a, theihtawpin hma an la dawn, tiin a lo hrilh.
MLA-ten contractor hmasa hnuaia sub contractor-te bill pek chungchang an zawhna chhangin, NHIDCL executive director chuan, kumin October hi chuan a nawlpui tihfel an tum tih a sawi a. Tuna contractor chu nasa zawkin an hnathawh an enpui a, NHIDCL general manager-in a hmunah a vil tih a sawi. Vawiin – September 20 hian Lunglei DC-te nen inhmuha lirthei leh mipui kal dan tur ruahman an tum tih a sawi bawk.
Congress MLA pahnih hian mipui harsatna nasa tak tawkte dinhmun chu ngaipawimawh a, Lunglei to Tlabung, NH 302 chu a bik taka ngaihven zual turin NHIDCL hi an ngen a ni.