Thiamthil phochhuahna – PÛM tan

Labour, Employment, Skill Development & Entrepreneurship department-in Industrial Training Institute-a zir mek, zir chhuak tawh leh state chhunga kutthemthiamna lama tui leh thiamthil nei (grassroot innovators) tana a buatsaih, ni thum awh tur ‘PÛM 2023 – Innovation Competition & Exhibition Fair’ chu Nilaini khan Govt. ITI Campus-ah tan a ni.
A hawnna hmanpuitu chief secretary Dr Renu Sharma chuan exhibition-a telte leh chhimtuten an hlawkpui ngei a beisei tih a sawi a. Inelna rilru tello chuan hmasawnna tha zawk, kalphung tha zawk siamchhuah emaw hmuhchhuah emaw a harsa thin tih a sawi a ni. Eizawnna kawng hawng turin kutthemthiamna leh thil siamchhuah lama thiamna neite tan remchanna buatsaih a, mahni kutkawiha ei an zawn theih nana hma lak zel chu sawrkarin a ngaipawimawh tih a sawi a ni.
Govt. ITI-ah kum 2022- 2023 exam-ah zirlai zaa 98.02 in hlawhtlinna an chan avangin a lawmpui tih a sawi a. Hei hian India rama ITI tha berte zingah Mizoram a dah tih sawiin, ITI chu eizawnna atana zirna in tha tak a nih avangin zirlai hmeichhia tam zawk an awm zel a beisei tih a sawi bawk.
PÛM Fair hi Ministry of Skill Development & Entrepreneurship (MSDE) hnuaiah LESDE department buatsaih niin, sawrkar laipui scheme – Skills Strengthening for Industrial Value Enhancement (STRIVE) atang leh Atal Incubation Centre-SELCO Foundation (AICSF) Guwahati chu sum tumtu an ni. Inelna hi thuang hnih – engineering leh non-engineering group a then a ni a. Engineering-ah hian mi 28 telin non-engineering ah 35, a vaiin 63 an tel. Heng bakah hian sawm bik, innovator leh entrepreneur stall hawng 8 an awm a ni.
Exhibition Fair-a thil siam phochhuah hi mipui tan Ningani leh Zirtawpni hian lei theih a ni ang.