Serchhip damdawi in sa tan

Khum 100 awm theihna tur Serchhip District Hospital building thar sakna tur lungphum chu Nilaini khan Health & Family Welfare minister Dr R Lalthangliana chuan a phum.
Serchhip District-in Hospital building tha tak an nei tur chu lawmawm a tih thu minister hian a sawi a. Power Grid Corporation of India Limited (PGCIL) in an corporate social responsibility (CSR) fund diltu thahnem tak zingah detailed project report tha tak tak an dawn thin laiin, Serchhip district mipui duhsak taka hospital sakna tur sum an pe chu lawmawm a tih thu a sawi.
Serchhip bawrhsap kalchhuak ta, Aizawl bawrhsap ni mek Nazuk Kumar pawhin he project bul tantute fakin, a hlawhtlinna atan chief secretary Renu Sharma chuan a thawhhlawk hle tih a sawi. Hospital building thar sakna tur project hian a ruhrel dinna bakah hmanraw leina tur sum thahnem tak a kengtel a, Serchhip leh a chhehvel khaw mipui tan a tangkai dawn hle tih a sawi a ni.
Serchhip District Hospital sakna tur sum, vaibelchhe 21 hi PGCIL hian an CSR kaltlangin a sak man senso zaah za an tum dawn a ni. Sum senso zawng zawng ruahman zat atang hian vaibelchhe 2.52 hi hospital hmanrua lei nana hman tur a ni. PGCIL leh Mizoram sawrkar chuan 2022 May 27 khan inremna thuthlung an ziak. Hospital hi thla 36 chhunga sak zawh tura tih niin, March 2025 ah peihfel hman tum a ni. A satu atan hian Mizoram State Works Advisory Board chuan Zamzo Engineering Construction and Consultancy Aizawl a thlang. Building hlui thiah phalna leh thiahna tur senso hi PWD-in Mizoram sawrkarah a dil mek a ni.