Nilaini zan Champions League inkhel

Nilaini zan Champions League inkhel
Bayern Munich-in 4-3-in an mikhual Manchester United an hneh a, Premier League club inlan dang Arsenal erawh an kawtkaiah sili faiin an chak thung.
Bayern Munich 4-3
Manchester United
Allianz Arena, Munich-a Uefa Champions League Group A match-ah hian Leroy Sane leh Serge Gnabry-te goal hmangin mualneitu team-in half time-ah sihnih faiin hma an hruai phawt a; second half tir lamah Rasmus Hojlund chuan Old Trafford club siphurh pakhat sut thenin, minute 53-ah Harry Kane chuan Christian Eriksen-a handball atanga an hlawhchhuak penalty chhuihlutin Bayern goal phai a chhungkhat a, Bundesliga giants hian sihnih fai bawkin hma an hruai nawn leh.
Hun pangngai tawp hma minute hnih la awmah Casemiro chuan hnai set sawt atangin United goal hnihna a thawh a, hun pekbelh minute hnihnaah substitute Mathys Tel chuan Munich tan tilut ve lehin, minute thum a liam leh hnuah Casemiro bawkin United tan khung ve leh mah se English team-in an siphurh sut zo turin hun an nei ta lo.
Red Devils hi an game hnuhnung pahnihah Brighton & Hove Albion leh Arsenal lakah 1-3 ve vein an tlawm a, Europe-ah sithum chuang chhuah lehin, December 1978 hnu lama match thum chhung goal thum leh a chunglam chin an chhuah zawn tum khatna a ni ta.
Mualneitu team thung kha Champions League group stage home match an khelh hnuhnung vawi 28-ah an tlawm lo fai vek.
Group A match dangah Galata-saray chuan hun tawp lama goal hnih thunin player 10-a tawp khar FC Copenhagen lakah 2-2 draw an hlawhchhuak hram.
Turkish champion lamah Mohamed Elyounoussi leh Diogo Goncalves-te’n goal an khung zet a, Copenhagen player Elias Jelert hnawhchhuah a nih hnuah inkhel boruak inherdanglamin, a tam zawka khel Galatasaray erlet tan mikhual team lakah Sacha Boey leh Tete chuan goal an khung a, beiseiloh takin Turkish team-in an kawtkaiah point khat an hlawhchhuak hram.
Arsenal 4-0 PSV Eindhoven
Emirates Stadium, London-a Group B match-ah Gunners-in nuam an chen a ni ber a, tualchhung football-a bul an tan that Europe-ah an chhunzawm kal zel.
Europe club inelna sang bera kumruk zet an kalbo hnua an kirleh tumin Arsenal hian an Dutch mikhual team lakah harsatna lian an tawk lo a, first half-a Bukayo Saka, Leandro Trossard leh Gabriel Jesus-te goal khat theuh thawhkhawm hmangin half time-ah sithum faiin hma an hruai hman.
Second half laihawlah captain Martin Odegaard chuan home team tan goal khat a thun belh ve leh.
Arsenal hian Premier League game hmasa panga atanga point 13 rutin, Champions League lamah pawh duhthusama thain bul an tan a; karleh khian Lens an luhkhung leh dawn a; PSV-in London khuaa an hliampui tawrh tuamdam turin Sevilla an mikhual thung ang.
Pathianni north London derby-a Tottenham Hotspur an hmachhawn tur rilrua hre reng chungin Arsenal manager Mikel Arteta chuan Nilaini zanah second half chhungin Saka, Jesus leh Declan Rice a lachhuak a, an regular player chhuah hnuah pawh an hniam phah lo!
Group B inkhel dangah French club Lens chuan kum 20 chhunga Uefa Champions League match an khelh vawikhatnaah point khat an thawk-chhuak nghal a, chu pawh Sevilla khelmualah niin, Spain ramah hian 1-1 draw an hlawhchhuak.
Seville khuaa Ramon Sanchez-Pizjuan Stadium inkhelah hian Lucas Ocampos chuan minute kuana lekah mualneitu team hmahruaina goal atauhlut zet a, first half minute 27-na maiah Angelo Fulgini chuan free-kick atangin Ligue 1 club siphurh sutna goal a chhuihlut a, La Liga club lamin an hmahruaina neilet tura goal dang an thunbelh zawh tak loh avangin team pahnih hi chak zawk awm loin an inthathen.
Real Madrid 1-0 FC Union Berlin
Champions League debutants lakah mualneitu leh Europe-a hnuhma hraw hnutchhiah tawh Real an chak zo lo teuh hle a, hun pekbelh minute lina a kal mek laia Jude Bellingham goal hmangin hnehna an sualchhuak thei hram a ni.
Group C bul an tanna inkhela hnehna an chan leh tak nen Spanish giants hian season thar inelna hrang hrangah tlawm an la nei lo a, a zawnin vawiruk an chak tling ta a ni.
Santiago Bernabeu inkhela Los Blancos chakna goal awmchhun khungtu Bellingham khan tun season-a game ruk a khelh tawhah goal ruk a tilut tling a, lei fuh a nihzia Europe thleng thlengin a pholang kal zel.
He tournament-a tum 14 tehreng champion tawh Real hian first half-ah inkhel thunun hneh hle mah se Union tlarhnung an paltlang zo tlat lo a, kumin nipui laia Juventus atanga an sengluh thar veteran Italy defender Leonardo Bonucci an kawl vang a tih loh theih loh ang.
Bul tan hlauhawm viau mah se Real forward Joselu pawhin a tir lamah tum hnih ngawt a hun tha hmuh a bawhpelh a; second half-ah pawh Rodrygo goal tur chu tum hnih ngawt Union keeper Frederik Ronnow chuan a dansak bawk.
Italian manager Carlo Ancelotti mangangin Valverde leh Toni Kroos luhtir mah se kawngro a sut phah chuang lo a; Joselu leh Rodrygo bakah Antonio Rudiger pawhin hun tawp lamah a hun tha neih bawhpelhin, chak zo lo mai tura ngaih an nih tawh hnuah midfielder Bellingham chuan a club thar Real tana Champions League game a khelh vawikhatnaah goal pawimawh khungin a team a chakpui.
Kum nga kalta maia German football second tier lama la khel leih leih Union hian an match khelh leh turah Sporting Braga an tum ang a, Real Madrid-in Napoli an luhkhung thung ang.
Nilaini zan Group C inkhel dangah Sporting Braga chu an khelmualah Serie A club Napoli-in 2-1-in an hneh.
Group D lam
Nilaini zan Reale Arena, San Sebastian, Spain-a Inter Milan teilut chuan 1-1 draw an hlawhchhuak a, hun tawp dawna Lautaro Martinez-a goal thun hmangin an chhuahvahna lamah season liamta runners-up team-in point khat an hlawhchhuak hram a ni.
Basque team tan tun hi thangkhat lian ral hnua Champions group-stage an chuankai leh vawikhatna niin, Serie A hmahruaitu team lakah Brais Mendez-a goal hmangin hma an hruai zet a, hun pangngai tawp hma minute thum chiah awm tawha Martinez-a goal hmangin Inter an him hram a ni.
Group D inkhel dangah RB Salzburg chuan sihnih faiin mualneitu leh Portuguese champion ni bawk Benfica an hneh.

Nilaini zan inkhel

Real Madrid 1-0 Union Berlin
Bayern Munich 4-3 Manchester United
Arsenal 4-0 PSV Eindhoven
Real Sociedad 1-1 Inter Milan
Galatasaray 2-2 FC Copenhagen
Sevilla 1-1 Lens
Sporting Braga 1-2 Napoli
Benfica 0-2 RB Salzburg