Ri hmanga chaw zawng – Bãk

Bak sa hi Zopa damdawi chi khat, ‘zun cheh damdawi’ atana hman thin anga sawi a ni a. Bak man nan hian, thim hlimah mau tlawnin bak thlawk vel hi an hawl vak thin; chu chu ‘bak hawl’ an ti a. Boruaka mau ler inthen kual vel chuan bak thlawk lai a fuh chang a awm thin. A chang chuan mau lerah Rawmûng an phuar bet a, chu chu bãkin a kea rawn tham a tum a, Rawmûng zawkin a lo tham bet ta thin a ni.
Bak hian a ka leh hnar atangin ri sâng tak, mihring hriat ve phak loh khawpa ri fiak sâng em em mai ‘ultrasound’ an tih chu an tichhuak a, chumi riin thil sakhat a va sut khan a sawhkhawk lo let leh chu a bengin a lo teh a, ri sawhkhawk let leh chak zawng atangin eng tia hla nge tih leh, eng thil nge a bul hnaiah awm tih a lo thliar hrang hrang zung zung thei ta thin a ni. Hetianga ri sawhkhawk hmanga thil hlat zawng te, eng thil nge a nih, thing nge, lung bang nge, rannung nge, tih zawng zawng chu ri chi hrang hrang a tihchhuah sawhkhawk let leh atangin a lo thliar hrang vek thei a, hei hi “Echolocation” tia vuah a ni a; a superpower ve a ni ber awm e.
Bak hian mit chu nei ve bawk mah se, a khaw hmuhna hi a chak fahran lo va, zan lama chaw zawng (nocturnal) an nih avangin chhun khaw en lai aiin zan lamah an khaw hmuh hi a fiah deuh zawk a. An chaw zawnnaah erawh an mit aiin ‘ri’ hi an hmang rim zawk. Zana boruaka rannung thlawk vel (phingphihlip leh rannung dang) te hi boruaka thlawk kawi zawr zawr chungin an mit ni lovin an ri tihchhuah hmangin an hmu zung zung mai tihna a ni.
Mizo pi leh pute khan Bakte hian ri hmangin chaw an zawng thin tih an lo hria em maw ni tehreng ni, mau ler kha tan bul mai lovin an zuah zuih ral raih a, chu chu boruakah an vai ri vak vak ta thin a, chu chuan Bak hman tangkai em em ‘echolocation’ kha a tihbuai an ring niin a lang!