Women’s reservation bill pawm fel ta

Rajya Sabha chuan women’s reservation Bill chu lungrual takin an pawmfel ta a, Prime Minister Narendra Modi chuan lungrualna chuan mipuiah inrintawkna nasa zawk a thlen ang tiin a sawi.
Constitution (128th Amendment) Bill, or Nari Shakti Vandan Adhiniyam leh a clause parukte chu Upper House a member 214-in an vote a ni. “Hlawhtlinna chhinchhiahtlak a ni” tiin Rajya Sabha Chairman Jagdeep Dhankhar chuan Bill pawmfel hnuah a sawi zui bawk a ni.
Opposition member thenkhat ten dante chu census leh delimitation exercise neih fel hnua kalpui chauh tumna chu siamthat ni se an tih chu voice vote hmanga hnehin a awm a ni. He bill hi Nilaini khan Lok Sabha chuan a lo pawmfel tawh bawk.
Bill sawihona neihah thusawitu 72 lai an awm a, thusawite chu poetry leh couplet-te nen a inchawhpawlh nuai a. Sawihona pawh hmeichhia ten Chair luahin an inkaihhruai tawn chhawk a ni. Inhnialna awm chhun chu opposition tena Other Backward Class (OBC) tana 33% reservation chhunga seperate reservation siam an ngiat a ni.
Ruling party aiawha thu sawitute he bill sawimawia PM Modi vang liau liaua hlawhtling thei tia sawitute chu Opposition member te chuan sawisel letin Bill chu Prime Minister Modi-an hmeichhiate a ngaihsak em avanga kalpui bik liau liau anga sawi chi a ni lo an ti ve thung.
Hei bakah hian Bill title – Nari Shakti Vandan Adhiniyam tih pawh sawiselin, “He bill hming hi chunglam malsawmna ang hrimin a hming in phuah a. Divine blessing a ni lo va, kan constitutional rights a ni” tiin Congress MP Ranjeet Ranjan, Opposition aiawha sawi hawngtu chuan a sawi.
Hei bakah hian sorkar chu hmeichhiate an ngaihsak danah zawhna neiin Manipur-ah hmeichhiate saruaka an parade laiin an ngawi a, hmeichhe wrestler te Jantar Mantar a lungawi lohna an lantir laiin ngawih an chuh bawk, a ti a. Chu mai ni lovin new Parliament hawnna neihah pawh President Droupadi Murmu chu an sawm lo bawk, tiin an sawi bawk.
Hei hi chhang letin BJP member te chuan Centre-in hmeichhiate tan liau liaua scheme a kalpui Ujjwala scheme-te chu an sawi lang thung a. Union Finance Minister Nirmala Sitharaman chuan gender ration-in hmasawnna a hmuh thu leh Centre chuan Army school pawh hmeichhiate tan a hawng tawh a ni tiin a sawi bawk.
“Eng vangin nge sorkarin he dan siam tur hian kum kua leh a chanve a nghah, eng vangin nge kum 2029 atanga hman tan chauh tura a tih?” tihte chu Opposition speaker te thusawi ber a ni.
Leader of Opposition Mallikarjun Kharge chuan Centre chuan demonetisation-te pawh kalpui thut thei turin thutlukna a siam chungin, eng vangin nge he Bill party tin tena an thlawp pharh tura kum kua leh a chanve a nghah tiin zawhna a siam a. “Tun hi a hun dik tak a ni” tiin Law Minister Arjun Ram Meghwal chuan chhangin Sitharaman pawhin Bill chu uluk leh fimkhur taka siam a ni a ti.
Trinamool Congress MP Dola Sen chuan Congress sorkar Karnataka leh Punjab leh Delhi-a Aam Aadmi Party (AAP) sorkar chu pro-women scheme an kalpui avangin a fak a. AAP MP Sandeep Pathak pawhin tun hmaa hmeichhiate tana reservation awm theih nana Congress-in hma a lo lak tawhnate a fak bawk. Indian National Development Inclusive Alliance (INDIA) MP te pawhin centre chu Bill-ah provision hran 33% reservation-a OB hmeichhiate telh turin an ngen a, hei hi non-INDIA bloc party YSR Congress Party (YSRCP) te pawhin an thlawp thu an sawi a ni.
Regional party-te chuan an party platform-a hmeichhe aiawh chungchang sawiin leh an sorkar theuh tena pro-women scheme an kalpuite an sawi lang bawk a. Sen pawhin Union government chuan Bengal Chief Minister Mamata Banerjee hnen atangin zirlai zir se tiin a sawi bawk.
Women’s reservation bill chu house pahnihin an pawm fel tak hnuah dan a nih theih nan chuan President remtihna leh hming ziah hnan chauh a ngai tawh a. Chu erawh thil chiang sa tura ngaih a ni nghal thung.