UN inkhawmpuiah Jaishankar-a’n Indian palaite ho dawn

External Affairs Minister S Jaishankar-a chuan tun kar chhunga UN General Assembly neih tura Indian palaite a ho dawn tih external affairs ministry-in a puang.
Jaishankar-a hian New York-a 81st UN General Assembly-ah hian Inrinni hian thu a sawi dawn tih ministry chuan Pathianni khan a puang a. Assembly a chhim chhungin ram dang hruaitute pawh a kawm dawn bawk.
Thawhlehni atanga karleh Thawhtanni thlenga assembly turah hian ram hrang hranga sorkar hotu lawk ber berte an tel dawn a, an ram theuhvin a ngaimawh thilte sawi chhuahna hun remchang pawh an nei dawn.
Bangladeshi Foreign Minister Khalilur Rahman-a chuan General Assembly session hi a kaihruai dawn a, kumina thupui hi ‘Restoring trust, managing transformation: A UN that delivers for all’ tih a ni ang.
Prime Minister Narendra Modi-a chu nikum UN General Assembly pawh kha a lo tel lo tawh a, Jaishankar-a thovin India aiawha thawk chhuakte a ho.
Bangladeshi Prime Minister Tarique Rahman-a’n Ninganiah thu a sawi ang a, a tukah Pakistani Prime Minister Shehbaz Sharif-a’n a sawi ve bawk ang.
Kumin UN General Assembly-ah hian khawvel pum thawhhona chi hrang hrang sawi ho tur a ni a, Sustainable Development Goals tihhlawhtlin a nih theihna tur leh tanghova muanna, intluktlanna leh khawvel thang duang a awm theih nana hmalak dan turte an ngaihtuah ang.
General Assembly-ah hian Declaration on the Right to Development kum 40-na puala intawh khawm hran pawh awm tura duan a ni a, hei bakah hian sik leh sa inthlak nasa ven dan tur te, hripui leng laka himna tur, inbuatsaihna leh lo hmachhawn dan tur sawihona pawh a awm ang.
Khawvel puma tui chim chin sang mek zelin hlauhawm a thlen thei titawp tura hma lak dan tur te, awmze nei zawka International Day for the Total Elimination of Nuclear Weapons hman dan tur te pawh sawi a ni ang.
Tun tum UN General Assembly hi Secretary-General Antonio Guterres-a’n kum nga term vawi hnih a hman tawpna tur niin December-ah a hun hi a tawp dawn a ni.