Putin-an China tlawh tur tichiang tawh

Beijing top diplomat chuan President Vladimir Putin hnenah China leh Russia-te chuan khawvel thil thleng danglam zetah an thawk dun tur a ni tiin a hrilh thu Chinese state media chuan a tarlang.
Saint Petersburg-a meeting Putin nena neihah Russian leader chuan thla thara China tlawh a tum thu a lo hrilh, tiin Wang Yi chuan a sawi a, ‘khawvel chu multipolarity lam hawiin chak takin a kal mek a ni’ tiin a sawi.
“Economic globalization-in hmalam a pan mek a, ram pakhat thuneihnain awmzia a nei tawh lo va, hegemonism-in awmze thuk a nei thei tawh lo” tiin Wang chuan a sawi a ni.
“Ram pahnihte chuan multilateral strategic cooperation an tihchak a ngai a, international order dik leh fel a awm theih nan hma an lak a ngai a ni” tiin a sawi.
Wang hnenah Putin chuan ‘kan dinna leh multipolar world thleng mek hi a inang a ni’ tiin a sawi.
Hei bakah hian Putin chuan Chinese leader Xi Jinping-an China tlawh tura a sawmna chu a pawm thu sawiin, Belt and Road Initiative tihhmasawnna tura major event buatsaihah a telpui tur thu a sawi chiang zui bawk.
Putin hi thla thara Belt and Road Forum for International Cooperation, Beijing-a neih turah tel tura ngaihsa a ni a. China-in international infrastructure project a kalpui kum 10-na lawmna neih a ni dawn a ni.
China leh Russia-te hian ‘strategic allies’ intiin ram pahnihte hian an inlaichinna a bik takin economic leh military cooperation lamah chin tawk a awm lo an ti a ni.
Nikum February thlaa Russia-in Ukraine a run hnuah phei chuan an ram pahnihte inzawmna a hma ai zawngin a ngialnghet leh zual a, China chuan Russia chetlak dan chu a dem duh miah lo bawk.