Canadian PM Trudeau \ang na tlat

Canadian PM Justin Trudeau chuan Indian agent-te chu Canadian leilunga Sikh seperatist thahnaah an inhnamhnawih ngeia a lan thu a sawi nawn leh ngat.
Thawhtanni khan India inhnamhnawiha a puhna Trudeau-an a sawi chhuah hmasak ber chu India chuan ‘awm ang lo lutuk’ tiin a chhang na hle a.
Hardeep Singh Nijjar chu India in kum 2020-a India-in firfiaka a puan niin Canada-ah June thla khan temple pawnah kahhlum a ni.
Chuvang chuan Canada leh India inlaichinna chuan a chhiat phah hle a. India sorkar chuan Khawthlang rama Sikh seperatist tena Khalistan an ngiat chu a haw hle a ni.
India chuan Nijjar chu firfiak-ah a puang zui a, mahse amah thlawptute chuan an pawm hauh lo thung a, peaceful activist tia sawiin Sikh-te tana homeland ngiattu a ni an ti ve thung.
Trudeau puhna hian ram pahnih inkarah diplomacy lama inbeihna a thlen nghal a, ram pahnihte hi inthian tha em em ni reng thin an ni thung.
Mahse ram pahnihte chuan an ambassador-te inhnawhchhuah sak ve ve tawh a, Trudeau chuan a hmaa a thusawite chu a dik a ni tiin a sawi nawn leh sak thung.
UN General Assembly New York khawpuia neihah, “Thawhtannia ka sawi tawh ang tho khan Canadian leilungah Canadian thah a nihnaah India sorkar agent-te inrawlh ngeia rinna chhan tha kan nei a ni” tia sawiin, “Canada chu rules based international order duh tlattu a ni” tiin a sawi bawk.
Reporter tena finfiahna chu an nei tha tawk em tia an zawhna chu Trudeau chuan chiang faka chhang lovin mahse Canada chuan ‘independent justice system tha tak a nei’ tia sawiin “He justice hi dik leh fel taka lekkawh a nih kan duh a ni” tiin a sawi bawk.
Heng puhna te sawi chhuak tur hian thutlukna awlsam taka an sawi loh thu sawiin ngunthluk taka ngaihtuah hnua sawi chauh an nih thu a sawi.
Indian Prime Minister Narendra Modi chuan heng puhna hi a pha em tia zawhna chu Trudeau chuan Modi nena sawihona tlang hraka an neih tawh thu leh a ngaih dan leh hmuh dan te chiang faka a sawi thu a sawi bawk. Trudeau hian tun hnaiah G20 meeting neihnaah India tlawhin chutah chuan Modi nen an inhmu a ni.
India chuan na taka chhang letin Canada-ah anti-India activities nasa tak a thleng mek tia sawiin Indian diplomat-te laka tharum thawh tura infuihna pawh a awm tiin a sawi.
Trudeau thung chuan Canada chuan huatna hnawlin ‘freedom of expression’ a chawinung tlat tiin a sawi bawk.
Trudeau-an thu a sawi hma lawk hian India foreign ministry thupuangtu Arindam Bagchi chuan reporter-te hnenah “Information min pekte chu ngun taka enfiah kan tum a ni. Mahse, tun thlengin engmah dawn kan la nei lo a ni” tiin a sawi.